Ukraina delegatsiyası, sentâbr 30 - oktâbr 4 künleri keçecek Avropa Şurasınıñ Parlament Assambleyasınıñ küz sessiyasında iştiragini resmiy şekilde red etti.
Delegatsiya başı, "Halq hızmetçisi"nden halq mebusı Yelizaveta Yasko, benatan metnini Facebookta derc etti, o, Ukraina parlamentiniñ saytında da bar.
"Biz, sentâbr 30 - oktâbr 4 künleri keçecek PACE-niñ küz sessiyasında yañı Ukraina delegatsiyasınıñ vekâletini tasdıqqa bermemege qarar aldıq. Bu areketimiz - Ukrainağa qarşı rusiye tecavuzı neticesinden qabul etilgen Assambleya qararlarını yerine ketirmezden, Rusiyeniñ PACE sessiya zalına qaytarılmasına cevap olacaq", - yazdı Yasko, dep bildire Radio Svoboda.
Aynı vaqıtta, delegatsiya azaları, "Assambleyağa, Avropada demokratiya, uquq ve insan aqları imayesiniñ üstünligi nümünesi itibarını qaytarmağa usullar ve yollarnı tapmaq içün", PACE ortaqlarınen mesleatlaşuv keçirecek.
Hatırlatayıq, sentâbr 21-inde Tış siyaset Yuqarı Rada komitetiniñ reisi Boğdan Yaremenko, sentâbr 30 - oktâbr 4 künleri keçecek Avropa Şurasınıñ Parlament Assambleyasınıñ sessiyasında Ukraina delegatsiyası iştirak etmeycegini haber etti.
Ukraina halq deputatı, qırımlı iş adamı Rustem Umerov Ukrainanıñ Avropa Şurası Parlament assambleyası eyyetiniñ reis muavini olaraq saylandı. Bu aqta Umerov sentâbrniñ 20-nde Facebook saifesinde yazdı. Eyyet yolbaşçısı olaraq Yelizaveta Yasko («Halq hızmetçisi»), reisniñ birinci muavini olaraq Sergey Sobolev («Batkivşçına» umumukrain birleşmesi) saylanğan edi.
Avropa Şurası Parlament assambleyası iyünniñ 26-nda Rusiye eyyetini sanktsiyalarsız qaytarmağa qarar aldı. Estoniya, Gürcistan, Latviya, Litvaniya, Poloniya, Slovakiya ve Ukraina eyyetleri Avropa Şurası Parlament assambleyasında Rusiye eyyetine qarşı bütün sanktsiyalar lâğu etilgen soñ toplaşuv salonını terk ettiler.
