Ukraina halq deputatı, qırımlı iş adamı Rustem Umerov Ukrainanıñ Avropa Şurası Parlament assambleyası eyyetiniñ reis muavini olaraq saylandı. Bu aqta Umerov sentâbrniñ 20-nde Facebook saifesinde yazdı.
«Eyyet yolbaşçısı olaraq Yelizaveta Yasko («Halq hızmetçisi»), reisniñ birinci muavini olaraq Sergey Sobolev («Batkivşçına» umumukrain birleşmesi) saylanğan edi. Ukrainanıñ menfaatlarını beraber qorçalaycaqmız! İşanç içün sağ oluñız», – dep qayd etti Umerov.
Umerov «Ğolos» («Ses») firqasından Ukraina Yuqarı Radasınıñ deputatı olaraq saylandı.
Hatırlatamız, sentâbrniñ 30-ndan oktâbrniñ 4-ne qadar keçirilecek Avropa Şurası Parlament assambleyasınıñ küz sessiyasında Rusiyeniñ Qırım işğalinden soñ qırımtatarlarnıñ vaziyeti muzakere etilmeli.
Avropa Şurası Parlament assambleyası iyünniñ 26-nda Rusiye eyyetini sanktsiyasız qaytarmağa razı oldı. Buña cevap olaraq Estoniya, Gürcistan, Latviya, Litvaniya, Poloniya, Slovakiya ve Ukraina eyyetleri toplaşuv salonını terk etti.
PACEniñ Rusiye eyyetiniñ rey aqqını ğayrıdan tiklemek qararından soñ Kreml Ğarpqa «Qırım vaziyetini ardı-sıra ve sabırlı bir şekilde añlatmağa» niyetlengenini bildirdi.
