Sentâbr 21-inde Tış siyaset Yuqarı Rada komitetiniñ reisi Boğdan Yaremenko, sentâbr 30 - oktâbr 4 künleri keçecek Avropa Şurasınıñ Parlament Assambleyasınıñ sessiyasında Ukraina delegatsiyası iştirak etmeycegini haber etti.
"Bu teşkilât öz printsiplerini bozğanına ve Ukrainanıñ fikrini ciddiy körmegenine, başqa imkânlar olmağanından, yekâne cevap olaraq, Ukraina PACEniñ kelecek sessiyasına öz delegatsiyasınıñ yollamasından vazgeçecek", - yazdı mebus Facebookta.
Onıñ aytqanına köre, delegatsiya, azırlıqnen ve Avropa Biriliginiñ başqa aza devletlerinen beraberlikte muzakereler keçirmeknen oğraşacaq.
Ukraina halq deputatı, qırımlı iş adamı Rustem Umerov Ukrainanıñ Avropa Şurası Parlament assambleyası eyyetiniñ reis muavini olaraq saylandı. Bu aqta Umerov sentâbrniñ 20-nde Facebook saifesinde yazdı. Eyyet yolbaşçısı olaraq Yelizaveta Yasko («Halq hızmetçisi»), reisniñ birinci muavini olaraq Sergey Sobolev («Batkivşçına» umumukrain birleşmesi) saylanğan edi.
Avropa Şurası Parlament assambleyası iyünniñ 26-nda Rusiye eyyetini sanktsiyalarsız qaytarmağa qarar aldı. Estoniya, Gürcistan, Latviya, Litvaniya, Poloniya, Slovakiya ve Ukraina eyyetleri Avropa Şurası Parlament assambleyasında Rusiye eyyetine qarşı bütün sanktsiyalar lâğu etilgen soñ toplaşuv salonını terk ettiler.
