Mayısnıñ 17-nde ya da 18-nde qırımtatar halqı genotsidiniñ yılına Ukraina Nazirler şurasınıñ binasını Ukraina ve qırımtatar halqınıñ milliy timsallerinen yarıqlatacaqlar. Bu aqta vaqtınca işğal etilgen topraqlarnıñ reintegratsiya meseleleri baş nazir muavini Oleksiy Reznıkov Qırım.Aqiqat Radiosınıñ yayınında ayttı.
«Meclis vekillerinen beraber leyha azırlaymız, ve şimdi ilk sefer tafsilâtlarını aydınlatam: mayısnıñ 17-nde ya da 18-nde aqşam ükümet binasında Ukraina ve qırımtatar halqınıñ milliy timsalleri şeklinde yarıq olacaq. Epiñizni davet etem – bu pek doğru olacaq», – dep bildirdi Reznıkov.
Ukraina prezidentiniñ Qırım Muhtar Cumhuriyetindeki daimiy temsilciligi aktsiyada iştirak etip, qırımtatar halqı sürgünliginiñ qurbanlarını añmağa çağıra.
Mayısnıñ 18-nde Ukrainada qırımtatar halqı ile birdemlik aftası başlana – «Bir acı. Bir tarih». O, qırımtatar halqı genotsidiniñ yılına bağışlanğan bir sıra aq qorçalayıcı ve media leyhasından ibarettir.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
