Qırımda fevralniñ 9-nda saba Rusiye quvetçileri qırımtatarlarnıñ evlerini tintti, bir qaç insan tutuldı. Tintüvler ve yaqalavlar aqqında «Qırım birdemligi» cemaat birleşmesi haber etti.
Tintüvler Qırımnıñ çeşit köşelerinde keçirildi: Bağçasaray, Qarasuvbazar rayonlarında ve Aqmescit ve Aqyarda.
«Regional faallerimizniñ malümatına köre, sabadan Qırımnıñ farqlı regionlarında bir qaç qırımtatarınıñ evinde tahqiqat tedbirleri keçirile», – dep aytıla haberde.
Faallerniñ malümatına köre, tintüvlerden soñ tutulğanlar:
- Osmanov Ansar İsmailoviç, Bağçasaray rayonı, Büyük Süyren (Tankovoye) köyü, Gagarin soq., 11. Tintüv yekünlendi, er adamı Qırımdaki FSB idaresine alıp ketirildi.
- Abdulvapov Amethan Necipoviç, Aqmescit, Beloye-5, Kürkçi soq., 20. Tintüv yekünlendi, er adamı Qırımdaki FSB idaresine alıp ketirildi.
- Mustafayev Marlen Ramisoviç, Qarasuvbazar, Aq Qaya (Belaya Skala) köyü.
- Seytosmanov Ernest Kazimoviç, Aqyar, Balıqlava rayonı, Hayto (Tılovoye) köyü, Lazurnaya soq. Tintüv yekünlendi, er adamı Qırımdaki FSB idaresine alıp ketirildi.
Tintüvler aqqında belli olğanı
Ansar Osmanov – Bağçasaray rayonıñ Büyük Süyren köyünde yaşay.
"Qırım birdemligi" cemaat birleşmesiniñ malümatına köre, Osmanov Qırımdaki siyasiy mabüslerge destek içün içtimaiy teşebbüslerde ve malümat kampaniyalarında iştirak etken. Qırımda ve Rostov-na-Donu şeerinde siyasiy motivli davalar ile bağlı mahkeme oturışlarına qatnağan.
2019 senesi oktâbr ayında Rusiye quvetçileri Ansar Osmanovnı Amet Suleymanov (üçünci Bağçasaray "Hizb ut-Tahrir davasınıñ mabüsi) ve faal Ali Kerimov ile birlikte Rostoav-na-Donudan qaytqanda Keriç köprü civarındaki avtomobil yolunda yaqlağan ediler. Erkekler "Hizb ut-Tahrir davası"ında (Yalta gruppası) diñleyici olaraq iştirak eten mahkeme oturışından qayi ediler.
Marlen Mustafayev – Qarasuvbazar rayonınıñ Aq-Qaya köyünde yaşay.
"Qırım birdemligi" cemaat birleşmesiniñ malümatına köre, maşnalarnıñ tamirinen oğraşa eken. Evli, eki balası bar.
"Qırım birdemligi" cemaat birleşmesiniñ göñüllisidir. Faal şekilde mahkeme oturışlarına qatnağan, tevqif etilgen mabüslerniñ qorantalarına yardım etken. 2017 senesi bir kişilik pikette iştirak etkeni içün 10 000 ruble para cezasına mahküm etilgen edi.
Ernest Seytosmanov –Balıqlava rayonınıñ (Aqyar) Tılovoye köyünde yaşay.
Ernest Seytosmanov 17 yıl apis cezasına mahküm etilgen Aqyar rayonıñ sakini Envera Seytosmanovnıñ doğmuş ağasıdır.
Rusiye quvetçileriniñ çarşenbe künü Ernest Seytosmanovnıñ evinde keçirgen tintüv artıq dörtüncidir. Seytosmanov bir özü yaşağanı içün telefon etip, evinde tintüv keçirilgenini kimsege haber etip olamağan. O, mahkeme oturışlarına faal qatnağan, tevqif etilgen mabüslerniñ ailelerini yardım etken, cemaat teşebbüslerinde iştirak etken. 2021 senesi evel yaqalanğan advokat Edem Semedlâyevni qarşılamağa kelgeni içün oña qarşı protokol tizilgen edi ve o 13 kün Aqmescit muvaqqat tüzetüv izolâtorında tutulğan edi.
Amethan Abdulvapov – Aqmescitniñ Beloye-5 qasabasında yaşay. Onıñ aqqında tafsilâtlı malümat yoq.
Tintüvden soñ Aqmescitniñ Franko 13 bulvarında yerleşken Qırım boyunca FSB idaresine alıp ketkenleri bellidir.
"Artıq saba saat 7-de tutulğanlarnı alıp kettiler"
Fevrlniñ 9-nda saba Rusiye quvetçileri tarafından yaqalanğan qırımtatarlarnıñ aqrabaları, tintüvler saba saat 4-te başlanğanını, aynı zamanda telefon alâqası ve advokatlarnen bağlanmağa çaresi olmağanını bildirdiler.
"Tintüv keçirilgen zaman advokatlarnıñ, aq qoruyıcılarnıñ telefon alâqası yoq edi, iç bir kimseniñ telefon etmege çaresi yoq edi. Bundan ğayrı, "Qırım birdemligi"niñ koordinatorı Dilâver Memetovnıñ ve cemaat jurnalisti Zidan Acikelâmovnıñ telefonları çalışmay edi. Tutulğanlarnıñ aqrabaları, tintüvlerr erte, saba saat 4-te başlanğanını aytalar. Tahqiqat tedbirleri tez keçti, saat 7-de qırımtatarlarnı alıp kettiler", - dep yazıla haberde.
Human Rights Watch maruzasında 2021 senesi işğal etilgen Qırımda Rusiye akimiyeti diniy ve siyasiy sebeplerden taqip etmege devam etti, dep haber etilgen edi.
Qırımlı jurnalist ve faallerniñ evlerinde keçirilgen tintüvler
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
