Bağçasaray rayonınıñ Ulaqlı (Glubokiy Yar) köyü civarında "Tavrida" trassasında fevralniñ 5-inde aqşam yol qazası oldı. Neticede üç adam yaralandı.
Bunı Rusiye FVN-niñ Qırım idaresiniñ matbuat hızmeti haber ete.
Müessise, yolda Mazda, Audi ve Ford Focus maşnaları urulğanını qoştı.
"Qaza neticesinde Mazda maşnasındaki üç adam zarar kördi, olarnıñ birisi 5 aylıq bala. Aydavcı maşna içinde qısılğan qaldı. Qurtarıcılar onı mahsus aletniñ yardımınen çıqardı. Adamlarnıñ üçüni de Bağçasaraynıñ Merkeziy rayon hastahanesine alıp kettiler", - aytıp berdi Rusiye nezaretindeki Qırım fevqulâde vaziyetler naziri Sergey Şahov.
Fevralniñ 6-sında saba Aqmescit-Bağçasaray-Aqyar yolunda yengil maşna ve yük maşnası çatıştı, qazada üç adam elâk oldı.
Fevralniñ 4-ünde aqşam "Kezlev - Aqmeçit" yolunda Saq rayonında eki yengil maşna - VAZ-2112 ve Geely - çatıştı. Qazada yedi adam yaralandı.
Qırımda fevralniñ 3-ünde, neticesinde piyadeler öldürilgen eki yol qazası oldı. Bir maşna Aluşta civarında aqaynı urıp öldürdi. O piyadeler keçitinden yolnı keçe edi. Ekinci qaza Keriçte oldı, anda tükân yanında aydavcı esli qadınnı bastı.
Daa evel İslâm Terek (Kirovskoye) rayonında fevralniñ 3-ünde aqşam "Tavrida" trassasında yengil maşna ve yük maşnası çatıştı. Üç adam yaralandı, olarnı hastahanege alıp kettiler.
