Latviya Seymi qırımtatar genotsidiniñ 75 yılı munasebetinen mayısnıñ 9-nda beyanat qabul etip, Ukrainağa bağlı Qırımnıñ qanunsız ilhaqını tanuv siyasetine qoltuttı ve «sovetler akimiyetiniñ bir çoq halqnıñ, şu cümleden qırımtatarlarnıñ taqip etüvi, genotsidi» aqqında hatırlattı. Bu aqta Azatlıq Radiosı haber ete.
«Bir sıra tarihiy menbada Sovetler Birliginde ve işğali altındaki topraqlarda yaşağan bir çoq halq ve etnik gruppalarğa qarşı taqip, genotsid aqqında aytıla, mında qırımtatarlar aqqında da laf kete, olarnıñ medeniy ve içtimaiy mirasını, Qırım yarımadasına tarihiy bağını yoq etüv ve qırımtatarlarnıñ vatanlarından sürgün etilüvi qayd etilmekte», – dep aytıla beyanatta.
Vesiqada Kremlniñ işğal altındaki yarımadada qırımtatarlarğa qarşı «zulum ve zorbalıq» siyaseti takbih etile.
«Rusiye vatandaşlığını almağan ve Qırımnıñ qanunsız ilhaqını tanımağan qırımtatarlar ayırımğa oğratıla. Olarğa tasil almağa, tibbiy hızmet köstermege, ana tilini qullanmağa, anane ve medeniyetini saqlap qalmağa bermeyler. Qırımtatarlarnıñ 75 yıl içinde ekinci kere sert repressiyalar, taqiplerge oğratıluvı ve vatanlarını terk etmege mecbur olğanı aqılğa uymağan bir şey. Tarihnıñ tekrarlana bilecegi qasevetlendire», – dep bildirdi Seymniñ Tış işler komitetiniñ reisi Rihards Kols.
Mayısnıñ 18-nde Ukrainada ve dünyada 1944 senesi Qırımdan sürgün etilgen qırımtatarlarnı añalar. Şu künü qırımtatarlar tolu birinci eşelon yarımadadan Orta Asiyağa yollanğan edi. Umumen 180 biñ kişi sürgün etildi.
Qırımnıñ çeşit şeerlerinde qırımtatar sürgünliginiñ qurbanlarını añma tedbirleri keçirile.
Ukraina Yuqarı Radasınıñ qararına köre, mayısnıñ 18-i Qırımtatar halqınıñ genotsid qurbanlarını añma künü olaraq ilân etildi.
