Qırım ilhaqından soñ taqibattan saqınıp, Canköyden 30-ğa yaqın "İyegova şaatı" çıqıp ketti. Bunı ükmü çıqarılğan künniñ arfesinde bu diniy teşkilâtnıñ vekili Sergey Filatov Qırım.Aqiqatqa bergen eksklüziv intervyüsinde aytıp berdi.
"Canköyden otuzğa yaqın adam ketti. Yaqın dostlarım, misal içün, özleri ve balaları içün qorqqanlarından ketti. Bu tek Canköy, Qırımnıñ başqa şeer ve bölgelerinde nasıl olğanını bilmeyim. Amma çoqusı çıqıp kete, dep eşittim", - aytıp berdi Filatov.
Daa evel Rusiyeniñ nezaretinde olğan Canköy rayon mahkemesi yerli sakin Sergey Filatovnı ceza koloniyasında cezası ile 6 yıl azatlıqtan marum etti. Onı Rusiyede yasaqlanğan "İyegova şaatları" diniy teşkilâtınıñ faaliyetinde iştirak etkeninde qabaatladılar.
Daa evel Rusiyede yasaqlanğan "İyegova şaatları" diniy teşkilâtınıñ azaları da basqığa oğradı. FSB hadimleri "ekstremist cemiyetni teşkil etüv" davasınıñ tahqiqatı çerçivesinde Canköyde sekiz tintüv keçirdi, keçken sene yoq etilgen "Sivaş" yerli teşkilâtınıñ sabıq reberi Sergey Filatov tutuldı, oña qarşı cinaiy dava açıldı.
Filatov - dört balanıñ babası, hasta qızını baqmaq içün Hersondan Qırımğa köçti.
«Memorial» aq qorçalayıcı merkeziniñ malümatına köre, qomşu Rusiyede keçken sene aprel ayından başlap mezkür diniy teşkilâtnıñ 39 tarafdarı uquqiy ceetten taqip etile. 2018 senesi avgust ayında «Memorial» aq qorçalayıcı merkezi, ekstremizmde qabaatlanğan «İyegova şaatları» diniy teşkilâtınıñ 29 tarafdarını siyasiy mabüs olaraq tanıp, olarnı acele azat etmege çağırdı.
