Martnıñ 5-inde Rusiyeniñ nezaretinde olğan Canköy rayon mahkemesi yerli sakin Sergey Filatovnı ceza koloniyasında cezası ile 6 yıl azatlıqtan marum etti. Bunı "Qırım birdemligi" cemiyet birleşmesi ve "Qırım Protsesi" haber menbaası haber ete.
Onı Rusiyede yasaqlanğan "İyegova şaatları" diniy teşkilâtınıñ faaliyetinde iştirak etkeninde qabaatladılar. Bildirile ki, üküm ilân etilgeninden soñra Filatovnı mahkeme binasından birden SİZOğa alıp ketkenler. Oturış açıq şekilde keçti. Ükümniñ ilân etilmesine yüzge yaqın adam toplandı.
Daa evel Rusiyede yasaqlanğan "İyegova şaatları" diniy teşkilâtınıñ azaları da basqığa oğradı. FSB hadimleri "ekstremist cemiyetni teşkil etüv" davasınıñ tahqiqatı çerçivesinde Canköyde sekiz tintüv keçirdi, keçken sene yoq etilgen "Sivaş" yerli teşkilâtınıñ sabıq reberi Sergey Filatov tutuldı, oña qarşı cinaiy dava açıldı.
Filatov - dört balanıñ babası, hasta qızını baqmaq içün Hersondan Qırımğa köçti.
