Moskvanıñ Basmannıy rayon mahkemesi qırımlı iş adamı Resul Velilâyev ve oña ait «KrımOpt» şirketiniñ müdiri Ali Bariyevniñ apis müddetini aprelniñ 25-inece uzattı. Bu aqta tuvğanları Facebook saifesinde bildirdi.
“Mahkeme sıñırlav tedbirlerini uzattı, Resül Velillâyev ve Ali Bariyev 2019 senesi aprel 25-ine qadar apiste bulunacaq. Aprelniñ 26-sında vatandaşlarımıznıñ tutulıp alınğanından doğru bir yıl olacaq, Rusiye qanunlarına köre ise adamnı bir yıldan çoq bir madde boyunca tutıp olamaylar. Tahqiqatçılarnıñ malümatına köre, tahqiqat tedbirleri soñuna kele ve aprelniñ 25-ine qadar Resül Velillâyev ve Ali Bariyevniñ taqdiri belgilenecek”, - denile beyanatta.
Resul Velilâyev Qırımda iş adamı ve metsenat olaraq belli. Onıñ «KrımOpt» şirketi 1997 senesinden berli çalışa, «Güzel» ticaret ağı da oña ait.
İş adamı Resul Velilâyev ve «KrımOpt» şirketiniñ müdiri Ali Bariyev aprelniñ 26-nda Qarasuvbazarda Rusiye telükesizlik hadimleri Velilâyevge ait «Güzel» ticaret ağı ve «KrımOpt» şirketinniñ tükânlarını tintken soñ tutulğan edi.
Daa soñra, Velilâyev 2 ayğa tevqif etilerek, Moskvadaki Lefortovo taqiqat izolâtorına (SİZO) qapatıldı. Qırımda oña qarşı Rusiye Cinaiy kodeksiniñ 238-nci maddesiniñ 2-nci qısmına binaen («Telükesizlik talaplarına uymağan mallar ve mahsulatnıñ istisalı, saqlanması ya da satılması, ve bunıñ kibi de işlerniñ yapılması ve hizmetlerniñ kösterilmesi) boyunca iş açıldı.
Qırımtatarlardan ğayrı, Rusiyede yasaqlanğan "İyegova şaatları" diniy teşkilâtınıñ azaları da basqığa oğradı. FSB hadimleri "ekstremist cemiyetni teşkil etüv" davasınıñ tahqiqatı çerçivesinde Canköyde sekiz tintüv keçirdi, keçken sene yoq etilgen "Sivaş" yerli teşkilâtınıñ sabıq reberi Sergey Filatov tutuldı, oña qarşı cinaiy iş açıldı.
