Türkiye Tış işler nazirligi qırımtatar sürgünligi qurbanlarını añma kününde beyanatını aydınlattı, dep bildire nazirlikniñ matbuat hızmeti.
«1944 senesiniñ mayısnıñ 17-18-ne keçer gecesi tahminen 250000 qırımtatarı ana vatanından sürgün etildi. 75 yıl evel insanlıqqa qarşı şaraitlerde sürgünlik vaqtında on biñlernen qırımtatarı elâk oldı. Bir çoqu ağır sürgünlik şaraitlerinde, vatan asretinen ana yurtlarından uzaqta elâk oldı. Soydaş qırımtatarlarınen qardaş Kavkaz halqlarınıñ acılarını paylaşamız, sürgünlerde elâk olğanlarnı rahmetnen anamız», – dep aytıla haberde.
Bugün Aqmescitte qırımtatarlarnıñ yarımadadan sürgün etilgeniniñ 75 yılına bağışlanğan matem tedbiri keçirile.
Mayısnıñ 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Şu künü qırımtatarlar halqınıñ Qırımdan sürgün etilüviniñ qurbanları hatırasına çeşit añma tedbirleri keçirile.
Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.
