Suvnı tutumlı masraf etmek içün Aqmescit sakinleriniñ sıcaq suvu söndürilecek, haber ettil rusiyeli Aqmescit başı Yelena Protsenko.
"Kelecek bazarertesi, fevralniñ 10-undan soñ, cumaertesi ve bazar künlerinden ğayrı sıcaq suv teminatınıñ qapatılması aqqında ve suvuq suvnıñ saba ve aqşam berilmesi cedveline keçmesi aqqında qarar alındı", - yazdı Facebookta Protsenko.
Onıñ aytqanına köre, daa tafsilâtlı malümat ve suv berilmesiniñ cedveli "Voda Krıma" müessisesiniñ ve Aqmescitniñ rusiyeli memuriyetinin saytlarında yerleştirilecek.
Fevralniñ 5-inde Moskova nezaretindeki Qırım Suv hocalığı ve melioratsiyası boyunca Devlet komitetinin başı İgor Vayl, Aqmescitte eñ çoqu 90-100 künlük içme suvu yedekleri qalğanını haber etti.
QMC-nde Ukraina prezidentiniñ daimiy vekili Anton Korineviç, yarımada işğalden boşatılmağance Şimaliy Qırım kanalından Qırımğa suv berilmesi yapılmacağında işandıra.
Yanvarniñ 27-nde Rusiye kontrolindeki Qırımnıñ suv hocalığı ve melioratsiya devlet komitetiniñ bildirgenine köre, yarımada suv anbarlarındaki suv yedekleri 2020 senesi iyün ayına qadar yetecegi aqqında malümat müessise saytında derc etildi.
Daa evel Rusiye kontrolindeki Qırımnıñ suv hocalığı ve melioratsiya devlet komiteti, yarımada suv anbarlarınıñ üçte biri tolu, dep bildirgen edi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
