Rusiye kontrolindeki Qırımnıñ suv hocalığı ve melioratsiya devlet komitetiniñ bildirgenine köre, yarımada suv anbarlarındaki suv yedekleri 2020 senesi iyün ayına qadar yeter. Bunıñnen bağlı malümat yanvarniñ 27-nde müessise saytında derc etildi.
«Suv anbarlarınıñ toldurılması dos-doğru özenlerniñ suvı, ava vaziyeti ve yağanaqlarğa bağlı. Tabiiy aquv suv anbarlarınıñ 37%-ı tolu. Bu suv yedekleri, kelecek suv esaplanmasa, aqımdaki seneniñ iyün ayına qadar suv teminlevi içün yeterlidir», – dep qayd etti Qırımnıñ Rusiye Suv hocalığı komitetiniñ yolbaşçısı İgor Vayl.
Onıñ malümatına köre, yarımada akimiyeti Keriç, Kefe, Sudaq ve Yedi Quyu mesken yerleriniñ ealisini 79 km uzunlığında Biyuk Qarasuv özeni boyunca tabiiy aquv Qarasuvbazar ve Taygan suv anbarlarından Şimaliy-Qırım kanalına ve Nejinskiy, Prostornenskiy ve Novogrigoryevskiy yerastı suv aluvlarından ileride onı Şarqiy Qırımnıñ suv anbarlarına doğrultıp, suv bermek işlerini teşkil etip, «suvnen temin etüv meselelerini al etmege» devam ete.
Daa evel Rusiye kontrolindeki Qırımnıñ suv hocalığı ve melioratsiya devlet komiteti, yarımada suv anbarlarınıñ üçte biri tolu, dep bildirgen edi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
