Rusiye FSBsiniñ hadimleri Qırım ve Herson vilâyetiniñ memuriy sıñırında qırımtatar aq qorçalayıcısı Abdureşit Cepparovnı kene tutıp, 2,5 saattan soñ yarımadağa kirsetti.
Bu aqta Cepparov Qırım.Aqiqat mühbirine bildirdi.
«Başta olarnıñ 4-ke 2,5 metrge mahsus qafesinde tuttılar, soñra odağa aldılar. Talap etkenim kibi, aqlarımnı oquğanlar. Soñra 51-inci maddeni (özüne qarşı şaatlıq etmemege imkân bergen Rusiye Anayasasınıñ maddesi – QA) qullanmağa imkânım barmı dep soradım. Maña bu alda 3 saat ve daa çoq devam etecek dediler, bir özüm degil edim ve mennen beraber ketken insanlarnıñ vaqtını almamaq içün suallerine cevap bermege qarar aldım», – dep bildirdi aq qorçalayıcı.
Onıñ aytqanına köre, adet üzre faaliyetinen bağlı bir sıra sual oldı.
«Soñra şahsiy eşyalarnı baqmağa başladılar, soñki kapikke qadar er şeyni baqtılar, çantamnıñ içinden er şey çıqardılar. Şaatlar bar edi, kamerağa çıqara ediler. Soñra belime qadar soyundırdılar. Protokol tizildi, onı şaatlar imzaladı. Tahminen 2,5 saat devam etti», – dep tarif etti Cepparov.
FSB hadimleri bunı izaatlamay.
Dekabrniñ 1-nde Rusiye quvetçileri Cepparovnı memuriy sıñırda eki saattan ziyaden sorğuğa çekti. Aq qorçalayıcı oktâbr ayında da tutulıp sorğuğa çekilgen edi. Cepparovnıñ fikirince, oña qarşı «dosye azırlaylar».
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
