Rusiye quvetçileri qırımlı aq qorçalayıcı Abdureşit Cepparovnı işğal etilgen Qırım ve Herson vilâyetiniñ memuriy sıñırında eki saattan çoq sorğuğa çekti. Bu aqta faal Rolan Osmanov Facebookta haber etti.
Faalniñ malümatına köre, Cepparovnı eki saattan çoq devam etken sorğudan soñ yibergenler.
«Sıñırda Abdureşit Cepparov tutuldı. Bugün, 01.12.19, Qırımdan çıqqanda 15-40-ta, Çonğar keçiş noqtasında sıñırdan keçkende Abdureşit Cepparov tutuldı, bunı haber etip yetiştirdi. O vaqıttan berli bağımız yoq», – dep yazdı o.
Bu malümatnı Facebookta diger faal İsmail Ramazanov da derc etti.
«Qırımnıñ memuriy sıñırında RF işğalci akimiyeti bugün saat 15:40-tan berli aq qorçalayıcı Abdureşit ağa Cepparovnı tuta», – dep aytıla haberde.
Daa soñra Rolan Osmanov, Cepparov bağğa çıqtı ve onı yibergenler, dep bildirdi.
«Eki saattan çoq devam etken sorğudan ve taqım teşkerüvinden soñ onı yibergenler», – dedi o.
Advokat Mammet Mambetov da Cepparov tutulğanını tasdıqladı. O, Qırım.Aqiqatqa izaat berip, aq qorçalayıcı Çonğar keçiş noqtasında üç saattan çoq tutuldı, dep bildirdi.
Qırım.Aqiqat, tafsilâtlı malümat almaq içün, aq qorçalayıcı Abdureşit Cepparovnen bağlanmağa tırışa.
Oktâbrniñ 31-nde Qırım ve Herson vilâyetiniñ memuriy sıñırında Rusiye quvetçileri qırımlı aq qorçalayıcı Abdureşit Cepparovnı kene tuttı.
Oktâbrniñ başında Rusiye sıñırcıları Herson vilâyetiniñ memuriy sıñırında «Armânsk» keçiş noqtasında esas Ukrainağa ketken qırımlı aq qorçalayıcı Cepparovnı bir saattan çoq tuttı.
Oktâbrniñ 14-nde Qırımtatar Milliy Meclisiniñ reisi, Ukraina halq deputatı Ahtem Çiygoz Qırım ve Herson vilâyetiniñ memuriy sıñırında Rusiye sıñırcıları qırımlı aq qorçalayıcı Abdureşit Cepparovnı kene tuta, dep bildirdi. Cepparovnıñ fikirince, oña «dosye şekillendirile».
Cepparov, oña qarşı «dosye azırlaylar», dep tüşüne.
