Rusiye quvetçileri Qırım ve Herson vilâyetiniñ memuriy sıñırında tutqan ve sorğuğa çekken qırımlı aq qorçalayıcı Abdureşit Cepparovnıñ fikirince, oña qarşı «dosye azırlanıla». Quvetçilerniñ bu areketleri onıñ aq qorçalayıcı ve cemaat faaliyetinen bağlı olması mümkün. Bu aqta o, Qırım.Aqiqatqa tarif etti.
Onıñ aytqanına köre, böyle sorğular 2019 senesi fevral ayından soñ muntazam sürette keçirile.
«Men anda oktâbrniñ 7-nde kelgen edim, bir saat ve qırq daqqa tuttılar. Tünevin (Qırımğa – QA) qayta edim. Keçkende aynı oldı: pasportnı beresiñ, o, (Rusiye arbiyi – QA) közüne baqa, soñra camnı qapata. Soñra, telefon etedir: olar yahşı baqılacaq obyekt olğanımnı ögreneler. Soñra da beklemek kerek olğanını aytalar. Ne qadar bekleyceksiñ, ne içün – aytmaylar. Soñra arbiy hızmetçi kele – ve vagonçıqqa ketemiz…», – dep cevap berdi Cepparov.
Aq qorçalayıcı bildirgenine köre, quvetçiler Cepparovnıñ statusını aytmay, tutulğanınıñ sebeplerini aydınlatmay.
«Çeşit sualler bereler: qaydan kelemiz, ne vaqıt doğdım, qayda, angi mektepte oqudım, qayda askerlik yaptım, Donbastaki adise-vaqialarğa nasıl baqam. Çeşit şeyler. Dünya baqışım, turmuş meseleleri. Nasıl para qazanam, Kyivde kimnen körüştim, ziyaretimniñ maqsadı ne… Olar dosye azırlaylar kibi kele… Daa çoq oturacammı sualine yuqarı kösterip böyle aytalar: «Bizim teşebbüsimiz degil, yuqarıdan keldi, biz qararlarnı yerine ketiremiz», – dedi Cepparov.
Oktâbrniñ 14-nde Qırımtatar Milliy Meclisiniñ reisiniñ muavini, Ukraina halq deputatı Ahtem Çiygoz Qırım ve Herson vilâyetiniñ memuriy sıñırında Rusiye sıñırcıları qırımlı aq qorçalayıcı Abdureşit Cepparovnı kene tuttı, dep bildirdi.
Oktâbrniñ 7-nde Cepparov işğal etilgen Qırımdan çıqqanda Rusiye sıñırcıları onı «Armânsk» keçiş noqtasında bir saatten ziyade tuttı.
Rusiye müessiseleri bu malümatnı resmiy şekilde izaatlamay.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
