Aqmescit "Hizb ut-Tahrir davası" boyunca makemelengen Teymur Abdullayev Salavat şeerindeki koloniyadan resmiy telefon etti. Bunı "Qırım birdemligi" teşebbüsine onıñ qadını Alime Abdullayeva aytıp berdi.
"Vaqıt az edi, o daa anasına telefon etmek istedi. Aytqanına köre daa çoq soradı. Qoranta içün qasevet ete. Basqı yapalarmı, yoqmı, tutuluv şarautleri ne, nasıl aşağanını soramağa tırıştım. Basqı aqqında böyle dedi: bu koloniyağa kelgen soñ, onı ŞİZOğa oturttılar ve alâ daa anda tutalar. Soñsuz ceza izolâtorı - budır basqı. İşkence tutuvul şaraiti demek mümkün", - ayta Alime.
"O bir kartserdir, dep ayta, anda pek suvuq, dımlı, mıtlaqa ava deñişkende. Sanki topraq üstünde dep körüne. Bütün sıcaq urbası er vaqıt üstünde. Ve böyle şaraitte artıq 80 kün tutula. Uquq qoruyıcılarnıñ, cemaatnıñ areketleri kerek. Aqayıma daa nasıl yardım ete bilecegimni bilmeyim", - qoştı Abdullayevniñ qadını.
Daa evel Aqmescitteki «Hizb ut-Tahrir davası» boyunca mahküm etilgen Teymur Abdullayev ve Emil Cemadenov eki aydan berli Rusiyeniñ Salavat şeerindeki koloniyalarnıñ ceza izolâtorlarında tutulğanları haber etile edi.
Advokat Emil Kurbedinovnıñ tarif etkenine köre, o, zenaatdaşı Edem Semedlâyevnen beraber müvekkilleri tutulğan №16 ve №2 koloniya reberleriniñ areketlerini şikâyet etti.
Aqmescitteki «Hizb ut-Tahrir davası» beş mabüsiniñ ömür arqadaşları aqaylarına Rusiye apsinde yapılğan basqı ve ceza izolâtorında uzun tutuluvı sebebinden Rusiye insan aqları vekâletlisi Tatyana Moskalkovağa muracaat etti.
Rusiye Yuqarı mahkemesi 2019 senesi dekabrniñ 24-nde istinaf şikâyetini baqıp, «Hizb ut-Tahrir davası» mabüsleriniñ (Aqmescitteki birinci gruppa) ükmüni deñiştirdi. Qırımlılarnıñ apis cezaları 6 ayğa eksildi.
Böylece, Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov 11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
2019 senesi iyün ayında Rostov-na-Donunıñ Cenübiy okrugınıñ arbiy mahkemesi bu dava mabüsleri Teymur Abdullayevni 17 yılğa, Uzeir Abdullayevni 13 yılğa, Rustem İsmailovnı 14 yılğa, Ayder Saledinov ve Emil Cemadenovnı 12 yılğa üküm etti.
Ukraina Tış işler nazirligi bu davağa qarşı narazılıq bildirip, Rusiyege qarşı sanktsiyalarnı quvetleştirmege çağırğan edi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
