Aqmescitteki «Hizb ut-Tahrir davası» boyunca mahküm etilgen Teymur Abdullayev ve Emil Cemadenov eki aydan berli Rusiyeniñ Salavat şeerindeki koloniyalarnıñ ceza izolâtorlarında tutula. Bu aqta advokat Emil Kurbedinov Qırım.Aqiqat mühbirine bildirdi.
Onıñ aytqanına köre, koloniyalarnıñ idareleri Cemadenov ve Abdullayevge basqı yapmaq içün etaptan soñ birden ceza izolâtorına qapattı.
«Teymur Abdullayev koloniyada bulunğan 70 künde eñ azından 15 kere ceza aldı. Anda ne olğanını daa bilmeyim, amma eminim, memuriyet bunı aselet yapa: töşekni yañlış topladıñmı – ceza, yañlış yerge baqtıñmı – ceza, etiketni yañlış tiktirdiñmi – ceza. Bu onı lagerde tutmamaq, diger mabüslerden izolâtsiya etmek ve koloniyadaki apishanege yarım yılğa yollamaq içün yapıla», – dedi advokat.
Emil Cemadenovnıñ ömür arqadaşı Liananıñ aytqanına köre, ceza izolâtorında bulunğan aqayınıñ sağlıq vaziyeti fenalaştı.
«O, mektüplerde ceza izolâtorındaki şaraitlerni tarif etti: suvuq, sers bir kamera. Töşekni divardan tek 21:00-dan saba 5-ke qadar ayıralar. Anda revmatizmi başlandı. Suvuqtan pek suvuqlanıp hasta olğandır. Bundan ğayrı, pek azdı. Aprel ayında Emil telefon etip, ceza izolâtorında tutuluvı kene uzatıldı, dep tarif etti. Martta telefon etkende şöyle ayttı: «Belki, mında tutulsam, ceza izolâtorından çıqıp olamam. Bunı ne içün yapqanlarını añlamayım. Üç yıl içinde (koloniyağa avuştırılmazdan evel – QA) Emil bir kere bile kartserde oturmadı», – dedi Liana Cemadenova.
Advokat Emil Kurbedinovnıñ tarif etkenine köre, o, zenaatdaşı Edem Semedlâyevnen beraber müvekkilleri tutulğan №16 ve №2 koloniya reberleriniñ areketlerini şikâyet etti.
«Başkortostan koloniyası, Başkortostan Cumhuriyetiniñ Cezalarnı yerine ketirüv federal hızmetiniñ idaresi ve Rusiye Cezalarnı yerine ketirüv federal hızmetlerine advokat muracaatlarını yolladı. Muracaatlarında angi aytqanları içün ceza izolâtorına avuştırılğanlarını soradı. Cevap qısmen berildi, tek ceza sayısı aqqında haber etildi, sebepleri aqqında bir malümat yoq. Bundan soñ Başkortostan prokuraturasına ariza yazıp, Başkortostan Cezalarnı yerine ketirüv federal hızmetiniñ idare yolbaşçısı ve koloniya yolbaşçısını advokatlarğa malümat bermegenleri içün memuriy mesüliyetke çekmege talap etti. Bizim vazifemiz – bu insanlar dünyanıñ o bir ucunda olsa da, biz olarnı ep bir qorçalaycaqmız ve vaziyetlerini bilecekmiz dep köstermektir», – dep ayttı Kurbedinov.
Aqmescitteki «Hizb ut-Tahrir davası» beş mabüsiniñ ömür arqadaşları aqaylarına Rusiye apsinde yapılğan basqı ve ceza izolâtorında uzun tutuluvı sebebinden Rusiye insan aqları vekâletlisi Tatyana Moskalkovağa muracaat etti.
Rusiye Yuqarı mahkemesi 2019 senesi dekabrniñ 24-nde istinaf şikâyetini baqıp, «Hizb ut-Tahrir davası» mabüsleriniñ (Aqmescitteki birinci gruppa) ükmüni deñiştirdi. Qırımlılarnıñ apis cezaları 6 ayğa eksildi.
Böylece, Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov 11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
2019 senesi iyün ayında Rostov-na-Donunıñ Cenübiy okrugınıñ arbiy mahkemesi bu dava mabüsleri Teymur Abdullayevni 17 yılğa, Uzeir Abdullayevni 13 yılğa, Rustem İsmailovnı 14 yılğa, Ayder Saledinov ve Emil Cemadenovnı 12 yılğa üküm etti.
Ukraina Tış işler nazirligi bu davağa qarşı narazılıq bildirip, Rusiyege qarşı sanktsiyalarnı quvetleştirmege çağırğan edi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
