Ekinci Aqmescit "Hizb ut-Tahrir davası"nıñ iştirakçisi Cemil Gafarovğa kerek olğan ilâclarnı Rostov-na-Donu şeeriniñ №5 SİZOsına yibermeyler.
Bunı Qırım.Aqiqat mühbirine advokat Rifat Yahin haber etti.
"Tahminen bir ay evel, men onı ziyaret etkende, müşterim Gafarov padagradan ilâc soray edi. Onıñ, er şeyden ğayrı, ayaqları da hasta. Bundan ğayrı, tamam bu ilâcnı oña tahqiqat izolâtorınıñ ekimi tevsiye etti. Bu tevsiyege baqmadan, bu ilâc müşterime kerek olğanını bir qaç kere añlatqanıma baqmadan, oña olarnı alâ daa bermediler", - aytıp berdi advokat.
Daa evel Gafarovnıñ advokatı, müşterisiniñ alı ağır olğanını bildire edi. Cemil Gafarovnıñ üçünci gruppa saqatlığı bar, sürekli büyrek hastalığı ve onen bağlı yürek hastalıqları. Advokat, ilâclarnı qabul etmegenlerinden ğayrı, Gafarovnıñ hastahanege qoymasını da red etkenlerini bildire.
"O, ekinci gruppa saqatlığını tasdıqlamaq içün hastahanege yatması kerek olğanı aqqında bir qaç kere yaza ve ayta edi. Amma onıñ bütün muracaatlarını nazar-itibarğa almaylar", - dedi Yahin.
Şimdilik Rusiye müessiseleriniñ bu malümatqa cevabı yoq.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Mezkür dava boyunca 25 qırımtatarı qabaatlana, 23-ü Rostov-na-Donu, Taganrog ve Şahtı SİZOlarına çıqarıldı. Raim Ayvazov Aqmescit SİZOsında tutula, daa bir kişi – Edem Yayaçikov – ğayıp oldı, bulunğan yeri martnıñ 27-nden berli belli degil.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
