Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildire. Bu aqta Rusiye Tış işler nazirliginiñ spikeri Mariya Zaharova ayttı, dep haber ete TASS.
«(Désirniñ – QA) böyle lafları bizni şaşıra. Bizler, şübhesiz, OSCE ögünde bu meseleni köterecekmiz, memurğa kerekli malümat yollap, böyle qıymet kesüvler ve malümatlar onıñ mandatına lâğu degil, dep kösterecekmiz. Désirni bunıñ kibi şeylerge, hususan terrorizm kibi ciddiy halqara telükenen bağlı adiselerge qıymet keskende daa diqqatlı yanaşmasına çağıramız. Qırımdaki kütleviy haber vastalarınıñ vaziyetine qıymet kesilgende üçünci memleketlerden, yarımadağa iç bir alâqası olmağan şübheli teşkilâtlarnıñ sebepsiz ve siyasiy beyanatlarına esaslanmamalı», – dedi Zaharova.
Onıñ bildirgenine köre, «laf terrorist teşkilâtınıñ faaliyetinde iştirak etkeninden ve cinayet işlegeninden şübheli sayılıp tutulğanlar aqqında kete».
«OSCE böyle faaliyetni er angi bir şekilde aqlağanına inanmağa istemeymiz», – dep qoştı o.
«OSCE kütleviy haber vastalarınıñ serbestligi meseleleri vekili terrorizmde qabaatlanıp tutulğanlarnı «vatandaş jurnalistleri» dep aytqanda ne demek istegenini bilmeymiz. Rusiye tarafı bu ceetten jurnalist ıstılasınıñ keniş izasını tanımay. Kütleviy haber vastalarınıñ hadimi statusı Rusiye qanunlarına köre alına ve, ilk evelâ, zenaat faaliyeti esasında», – dep ayttı Zaharova.
Bundan ğayrı, Zaharova «Désirni Qırımnı ziyaret etmege ve zenaatdaşlarınen fikirlerini şekillendirmege bir qaç kere çağırğanını» ayttı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırdı.
OSCE qayd etkenine köre, Qırımda martnıñ 27-nde keçirilgen tintüvlerden soñ vatandaş jurnalistleri Osman Arifmemetov, Rustem Şeyhaliyev, Remzi Bekirov tutuldı.
Bundan ğayrı, Désir 2018 senesi mart ayından berli «terrorist faaliyetine açıq çağırğanında» qabaatlanıp nezarette tutulğan qırımtatar blogeri Nariman Memedeminovnıñ devam etken apsi sebebinden qasevetlengenini bildirdi.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Martnıñ 27-nde ve 28-nde Aqmescitniñ Kiyev rayon mahkemesi tutulğan faallerni apiske aldı.
Martnıñ 29-nda Rusiye uquq qoruyıcıları Qırımdaki tintüvlerden soñ qıdırılğan qırımtatar faali Edem Yayaçikovnı tutıp aldı.
Aqmescitniñ Bavurçı qasabasında keçirilgen tintüv vaqtında semetdeşlerine qoltutmağa kelgenlerden eki kişi Eskender Mamutov ve Emil Ziyadinov da tutuldı. Aqmescit mahkemesi Ziyadinovğa «politsiyağa qarşı çıqqanı içün» 500 ruble para cezasını berdi. Mamutov ise 5 künge apiske alındı.
Remzi Bekirov, Riza İzetov, Ruslan Suleymanov, Farid Bazarov ve Şaban Umerov Rusiye Ceza kodeksiniñ 205.5 maddesiniñ 1-inci qısmına (terror gruppasınıñ faaliyetini teşkil etüv) istinaden qabaatlana. Qalğanları terror teşkilâtınıñ faaliyetinde (Rusiye Ceza kodeksiniñ 205.5 maddesiniñ 2-nci qısmı) iştirak etkeninden şübheli sayıla.
Martnıñ 29-nda Qırımnıñ Rusiye ombudsmeni Lüdmila Lubina Qırım.Aqiqatqa bildirgenine köre, Qırımda tevqif etilgen 23 qırımtatar faalini Rusiyege alıp ketkenler.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
