Link açıqlığı

Saatnıñ esas haberi

FSB, Qırımda «Hizb ut-Tahrirde» iştirak etkeninden şübheli sayılğan 20 kişi tutuldı, dep bildire (+foto)


Qırımdaki tintüvler, 2019 senesi martnıñ 27-si
Qırımdaki tintüvler, 2019 senesi martnıñ 27-si

Rusiye FSBsiniñ malümatına köre, Qırımda Rusiyede yasaqlanğan «Hizb ut-Tahrir» diniy teşkilâtında iştirak etkeninden şübheli sayılğan 20 kişi tutuldı. Bu aqta Rusiye devlet haber agentlikleri bildire.

Rusiye mahsus hızmetleri Qırımda keçirilgen kütleviy tintüvlerni «mahsus tedbir», tutulğanlarnı ise «Hizb ut-Tahrirniñ» adiy azaları ve reberleri» dep adlandıra.

Rusiye FSBsiniñ bildirgenine köre, «teşkilât azaları «dünya halifeliginiñ» quruluvı, lâdiniy cemiyet institutlarınıñ bozuluvı ve şimdiki akimiyetniñ zorbalıq küçü ile yıqıluvı doktrinasına esaslanğan anayasağa zıt faaliyetnen oğraşqan edi».

Rusiye uquq qoruyıcıları, tutulğanlar «yarımada sakinleri arasında terror mefküresini tarqattı, qırımlı musulmanlarnı öz saflarına celp etken edi», dep bildire.

Berilgen malümatqa köre, tintüvler vaqtında «Rusiyede yasaqlanğan «Hizb ut-Tahrir» propaganda malümatları, bağ vastaları, elektron malümat taşıyıcıları tapılıp alındı».

FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlar, şu cümleden «Qırım birdemligi» faalleriniñ evlerini tintti. Qırımtatar faalleriniñ malümatına köre, tintüvlerden soñ Rusiye FSB hadimleri eñ azından 15 insannı tutıp aldı.

Berilgen malümatqa köre, Rusiye uquq qoruyıcıları Rustem Seythalilov, Tofik Abdulgaziyev, Cemil Gafarov, Seyran Murtaza, Alim Kerimov, Farhad Bazarov, Riza İzzetov, Şaban Umerov, Bilâl Adilov, Mecit Abdurahmanov, Seytveli Seytabdiyev, Yaşar Muyedinov, Akim Bekirovnı da tutıp aldı. Olarnı Aqmescitteki Rusiye FSBsiniñ idaresine alıp ketkenler.

Bavurçıda keçirilgen tintüv vaqtında semetdeşlerine qoltutmağa kelgenlerden eki kişi Eskender Mamutov ve Emil Ziyadinov da tutuldı. Bunıñ sebebi Rusiye uquq qoruyıcıları ve Bavurçı qasabasınıñ sakinleri arasında çıqqan qavğa oldı.

«Qırım birdemligi» cemaat birleşmesiniñ haber etkenine köre, Aqmescitniñ Bavurçı qasabasındaki Memet Appazov soqağında semetdeşlerine qoltutmağa kelgen 5 kişi tutuldı. Olarnıñ soyadları qayd etilmey.

Rusiye FSBsi Qırımda tintüvler keçirilgenini tasdıqlap, şübhelilerniñ sayısını ve olarnıñ soyadlarını aydınlatmadı. Qırımdaki Rusiye ükümetiniñ reisi Sergey Aksenov Rusiye FSBsi ve Rusiye gvardiyası hadimleriniñ areketlerine «tolusınen qoltuta».

Haber etilgeni kibi, tintüvler Aqmescit rayonınıñ Mamaq (Strogonovka)köyü, Aqmescitniñ Bavurçı qasabası, Qarasuvbazar rayonınıñ Köneçi (Vladimirovka) köyünde keçirile.

Yarımadada keçirilgen tintüvler sebebinden Ukraina Milliy politsiyasınıñ Baş idaresi Ukraina Ceza kodeksiniñ 162-nci maddesiniñ 2-nci noqtasına istinaden cinaiy tahqiqat başlattı.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG