Yuqarı Rada deputatı, Ukrainanıñ PACE eyyetiniñ azası Rustem Umerov Ukraina parlamentinde «Qırım platforması» paketi çerçivesinde siyasiy mabüsler qanunı azırlanıla, dep bildirdi. Bu aqta o, Qırım.Aqiqatqa ayttı.
«Yaqında jurnalistimiz, zenaatdaşımızğa (Qırım.Aqiqat freelanceri, Vladislav Yesipenkoğa – QA) advokatlar kirsetilmedi. O, işkencege oğratılğanını mahkemede ayttı. Ne yazıq ki, bu mesele bizim içün pek qıyın, (siyasiy mabüslerniñ – QA) soy-sopları bizge muracaat ete ve biz siyasiy mabüsler qanunını keçirmege isteymiz. Onı prezidentniñ Qırım Muhtar Cumhuriyetindeki ve Aqyardaki temsilciligi azırlay ve olarnen beraber onı qabul etmege teklif etecekmiz. Bu sammitten evel keçirmege istegen «Qırım platforması» paketiniñ qanunlarından biri», – dep tarif etti Umerov.
Deputatnıñ qayd etkenine köre, bu qanun qabul etilse, siyasiy mabüslerniñ reintegratsiyasına yardım etecek, onıñ yardımınen maddiy yardım kösterilecek.
Hatırlatamız, iyülniñ 13-nde Rustem Umerov sessiya zalınıñ minberinden çıqışta bulunıp, Qırım.Aqiqat freelanceri Vladislav Yesipenkonı ve Qırım ve Rusiyedeki bütün ukrainalı siyasiy mabüslerni azat etmege çağırdı.
İyülniñ 6-nda Kyivniñ merkeziy meydanında Qırımdaki Rusiye mahkemesi tarafından apis cezası dekabrniñ 18-ne qadar uzatılğan Vladislav Yesipenkoğa qol tutuv aktsiyası ötkerildi.
Serbest Avropa Radiosı/Azatlıq Radiosınıñ prezidenti Jamie Fly Yesipenkonı acele azat etmege çağırdı. ABD Devlet departamenti Azatlıq Radiosınıñ freelanceri oğrağan vaziyet sebebinden qasevetlengenini bildirdi.
Apiske alınğan freelancer Yekaterika Yesipenko Vladislav daa bir maddege istinaden qabaatlana, dep bildirdi – Rusiye Ceza kodeksiniñ 222-nci maddesi (Silâ, esas parçalarını qanunsız aluv, berüv, satuv, saqlav ya da taşuv). Bu maddeniñ sanktsiyaları 5 yıldan 12 yılğa qadar azatlıqtan marum etüvni belgiley.
Aq qorçalayıcılarnıñ aytqanına köre, Qırımda Vladislav Yesipenko Rusiye Ceza kodeksiniñ 223.1 maddesine istinaden (Patlayıcı maddelerni qanunsız azırlav, qanunsız yapuv, ğayrıdan yapuv ya da patlayıcı cihazlarnı tamir etüv) qabaatlanğan edi. Bu maddege köre 8 yıldan 12 yılğa qadar apis cezası berile bile.
Matbuat serbestligi kününde Yekaterina Yesipenko aqayını işkencege oğratıp, şaatlıq etmege zorlağanlar, dep bildirdi.
Mayısnıñ 20-nde Ukraina prezidenti Volodımır Zelenskıy «Qırım platforması» sammitine 30 memleketniñ vekilleri kelecek, dep ayttı. Onıñ bildirgenine köre, Rusiye «Qırım platformasını» pek ağır yanaşa.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
