Qırımtatarlarnıñ seferber etilüvi genotsid ola bile, dep tüşüne «Krım SOS» aq qorçalayıcı teşkilâtınıñ talilcisi Yevğen Yaroşenko.
«İlk malümatqa köre, Qırımda celpnamelerniñ tahminen 90%-ını qırımtatarlar aldı. Aynı vaqıtta qırımtatarlar yarımada ealisiniñ 13-15%-ını teşkil ete. Bu seferberlik qırımtatar halqınıñ gizli genotsidi ola bile», – dep bildirdi Yaroşenko.
Qırım.Aqiqat muarririyeti Rusiye Federatsiyasınıñ ordusına alınğan qırımtatarlarnıñ sayısınen bağlı malümatnı teşkermege tırışa.
Aq qorçalayıcılar qayd etkenine köre, halqara uquq normalarına köre, etnik gruppanıñ tolu ya da qısmiy yoq etilüvi içün yapılğan şaraitler genotsid şekillerinden biri ola.
«Qırımtatarlar Ukrayına vatandaşları ve tamır halqı ola, Rusiye olarnı öz devletlerine qarşı cenkke atıp yoq ete bile», – dep qoştı Yaroşenko.
Aq qorçalayıcılar işğal etilgen topraqlarnıñ sakinlerini işğalci devletniñ ordusına alınması Jeneva şartnamesini boza ve cenk cinayeti ola, dep hatırlata.
«Ukrayına vatandaşlarınıñ öz devletine qarşı cenk uruşlarında iştirak etmelerine mecbur etüv ayrı cenk cinayeti ola», – dep qayd etile haberde.
Ukrayına prezidentiniñ Qırım Muhtar Cumhuriyetindeki daimiy vekili Tamila Taşeva Qırımda Rusiye arbiy komissarlıqları qırımtatarlar toplu yaşağan yerlerde celpnamelerni faal sürette bere.
Rusiye Federatsiyasınıñ prezidenti Vladimir Putin sentâbrniñ 21-nde memlekette qısmiy seferberlik ilân etilecek, dep bildirdi. Buyruqta tek yedekteki vatandaşlar ve arbiy hızmet körgenler alınacaq, dep aytıla. Başta olar qoşma azırlıq körecek.
Rusiye Mudafaa naziri Sergey Şoygu Rusiye ordusına 300 biñ insan alınacaq, dep bildirdi.
Şoygu bir qaç ayda ilk sefer Ukrayınağa qarşı cenkte ölgen Rusiye askerleriniñ sayısını aydınlattı. Onıñ aytqanına köre, fevralniñ soñundan berli Ukrayınadaki cenkte 5937 insan elâk oldı.
Ukrayına Silâlı quvetleriniñ Baş ştabı sentâbrniñ 21-ne qadar Rusiye ordusı Ukrayınada 55 biñden çoq askerni coydı, dep haber ete.
Sentâbrniñ 21-nde Rusiyede ilân etilgen qısmiy seferberlik sebebinden Qırım ve Aqyarnıñ Rusiye akimiyeti askerlikke aluv komissiyalarını quruv aqqında bildirdi. Sergey Aksenov esas Ukrayınağa 1200 «göñüllini» yolladı ve daa eki batalyon azırlay, dep bildirdi.
Qırımdaki Rusiye kütleviy haber vastaları «añlaşmalı arbiy hızmetniñ» reklamasını yapa.
İşğal etilgen Qırımnıñ tahminen 5000 sakini Rusiye prezidenti ilân etken qısmiy seferberlikten soñ arbiy komissarlıqqa celpname aldı.
Daa evel berilgen malümatqa köre, Qırım ve Aqyarda Rusiyeniñ Ukrayınağa qarşı cenkinde ölgen Rusiye arbiylerini defin etmege devam eteler.
Ukrayına prokuraturasınıñ malümatına köre, 2015 senesinden başlap Rusiye Qırımda Rusiye Federatsiyasınıñ silâlı quvetlerine askerlikke aluv qanunsız kampaniyasını 15 kere keçirdi. Aq qorçalayıcılar Qırım ve Aqyar sakinleriniñ Rusiye ordusına aluvını halqara uquq bozuluvı dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
