İşğal etilgen Qırımnıñ tahminen 5000 sakini Rusiye prezidenti ilân etken qısmiy seferberlikten soñ arbiy komissarlıqqa celpname aldı. Bu aqta «Krım SOS» cemaat teşkilâtınıñ talilcisi Yevğen Yaroşenko bildirdi.
«Elimizdeki malümatqa köre, sentâbrniñ 22-nde tahminen 5000 insan, şu cümleden qadınlar Rusiye ordusına celpnameler aldı. «Krım SOS» alğan malümatqa köre, işğal altındaki Qırım sakinlerine celpnameler cemaat yerlerinde bile berile: bazarda, blokpostlarda ve iş yerlerinde», – dep tarif etti Yaroşenko.
«Krım SOS» malümatına köre, Keriç, Aqmescit ve Bağçasaray rayonlarında Rusiye arbiy komissarlıqlarınıñ ve polisiniñ hadimleri «evlerge barıp, erkeklerni birden arbiy komissarlıqqa ala ediler».
«Krım – kray partizansköy slavı» Telegram kanalı bildirgenine köre, Qırımda Rusiye quvetçileri «celpnamelerni daa faal berip başladı».
«Aqmescit rayonınıñ Acı Qal (Çistenkoye) köyünden qırımlılar yaza, bugün köyde celpnamelerni bermeknen beraber erkeklerni birden avtobusqa mindire ediler. Menbalarnıñ malümatına köre: Acı Qal köyünde erkeklerni 3 avtobusqa mindirip alıp ketkenler», – dep aytıla Telegram kanalınıñ haberinde.
Sentâbrniñ 22-nde Aqmescitniñ Rusiye arbiy komissarı Aleksandr Çepurenko Qırımda Rusiye ordusı «bütün mütehassıslarğa muhtac», şunıñ içün «er kesni alalar», dep bildirdi.
Sentâbrniñ 21-nde Rusiyede ilân etilgen qısmiy seferberlik sebebinden Qırım ve Aqyarnıñ Rusiye akimiyeti askerlikke aluv komissiyalarını quruv aqqında bildirdi. Sergey Aksenov esas Ukrayınağa 1200 «göñüllini» yolladı ve daa eki batalyon azırlay, dep bildirdi. Qırımdaki Rusiye kütleviy haber vastaları «añlaşmalı arbiy hızmetniñ» reklamasını yapa. Daa evel berilgen malümatqa köre, Qırım ve Aqyarda Rusiyeniñ Ukrayınağa qarşı cenkinde ölgen Rusiye arbiylerini defin etmege devam eteler.
Ukrayına prokuraturasınıñ malümatına köre, 2015 senesinden başlap Rusiye Qırımda Rusiye Federatsiyasınıñ silâlı quvetlerine askerlikke aluv qanunsız kampaniyasını 15 kere keçirdi. Aq qorçalayıcılar Qırım ve Aqyar sakinleriniñ Rusiye ordusına aluvını halqara uquq bozuluvı dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
