Qırımnıñ Rusiye yolbaşçıları yarımadanıñ seferber etilgen sakinlerini mahsus azırlıqsız Ukrayinağa qarşı arbiy ameliyatlarda iştirak etmek içün yollaylar. Bunı "QırımSOS" aq qoruyıcı teşkilâtınıñ yolbaşçısı Oleksiy Tilnenko haber etti.
"QırımSOS"qa malüm olğanı kibi, işğal etilgen Qırımnıñ seferber etilgen sakinlerini mhsus azırlıqsız arbiy areketlerde iştirak etmek içün Herson vilâyetine yollaylar", - dedi o.
Onıñ sözlerine köre, seferber etilgenlerni, celpnamelerni alğanlardan soñ sadece eki kün keçirgenleri Aqyardan çıqaralar.
"Mevcut malümatqa köre, işğalciler bu vaqıt içinde talimler keçirmediler", - dep qoştı Tilnenko.
Qırım.Aqiqat bu malümatnı teşkermege tırışa.
Aqyardan Herson vilâyetine arbiy areketler mıntaqasına tahminen 2 biñ seferber etilgen rusiye arbiyi yollandı, dep haber etti Ukrayina Silâlı Quvetleriniñ Baş ştabı.
Sentâbrniñ 21-nde Rusiyede ilân etilgen qısmiy seferberlik sebebinden Qırım ve Aqyarnıñ Rusiye akimiyeti askerlikke aluv komissiyalarını quruv aqqında bildirdi. Sergey Aksenov esas Ukrayınağa 1200 «göñüllini» yolladı ve daa eki batalyon azırlay, dep bildirdi.
Qırımdaki Rusiye kütleviy haber vastaları «añlaşmalı arbiy hızmetniñ» reklamasını yapa.
İşğal etilgen Qırımnıñ tahminen 5000 sakini Rusiye prezidenti ilân etken qısmiy seferberlikten soñ arbiy komissarlıqqa celpname aldı.
Daa evel berilgen malümatqa köre, Qırım ve Aqyarda Rusiyeniñ Ukrayınağa qarşı cenkinde ölgen Rusiye arbiylerini defin etmege devam eteler.
Ukrayına prokuraturasınıñ malümatına köre, 2015 senesinden başlap Rusiye Qırımda Rusiye Federatsiyasınıñ silâlı quvetlerine askerlikke aluv qanunsız kampaniyasını 15 kere keçirdi. Aq qorçalayıcılar Qırım ve Aqyar sakinleriniñ Rusiye ordusına aluvını halqara uquq bozuluvı dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
