Aqyardan Herson vilâyetine arbiy areketler mıntaqasına tahminen 2 biñ seferber etilgen rusiye arbiyi yollandı, dep haber etti Ukrayina Silâlı Quvetleriniñ Baş ştabı.
"Sentâbrniñ 27-nden Aqyardan Harson vilâyetine Qırımda seferber etilgen tahminen 2 biñ kişi yollandı", - dep haber etile. Aynı zamanda, yarımadanıñ rusiye yolbaşçıları rusiye arbiyleriniñ başta arbiy areketler mıntaqasına degil, talimlerge yollanacağını bildirgen ediler.
Bundan ğayrı, Ukrayina Baş ştabınıñ malümatına köre, Qırımdaki rusiye arbiy komissarları "qırımtatarlarnıñ rusiye işğalci quvetleriniñ sıralarına celp etilmesiniñ prioritetleştirilmesi, olarnıñ eñ kergin bölgelerge yollanmasını na dair buyurıq alğanlar".
"Sentâbrniñ 26-sı devamında tek Saq rayonında 21 qırımtatar seferber etildi", dep haber ettiler Baş ştabda.
Faal arbiy areketler şaraitinde çatışma taraflarınıñ malümatınıñ mustaqil tasdıqını elde etmek mümkün degil .
Sentâbrniñ 21-nde Rusiyede ilân etilgen qısmiy seferberlik sebebinden Qırım ve Aqyarnıñ Rusiye akimiyeti askerlikke aluv komissiyalarını quruv aqqında bildirdi. Sergey Aksenov esas Ukrayınağa 1200 «göñüllini» yolladı ve daa eki batalyon azırlay, dep bildirdi.
Qırımdaki Rusiye kütleviy haber vastaları «añlaşmalı arbiy hızmetniñ» reklamasını yapa.
İşğal etilgen Qırımnıñ tahminen 5000 sakini Rusiye prezidenti ilân etken qısmiy seferberlikten soñ arbiy komissarlıqqa celpname aldı.
Daa evel berilgen malümatqa köre, Qırım ve Aqyarda Rusiyeniñ Ukrayınağa qarşı cenkinde ölgen Rusiye arbiylerini defin etmege devam eteler.
Ukrayına prokuraturasınıñ malümatına köre, 2015 senesinden başlap Rusiye Qırımda Rusiye Federatsiyasınıñ silâlı quvetlerine askerlikke aluv qanunsız kampaniyasını 15 kere keçirdi. Aq qorçalayıcılar Qırım ve Aqyar sakinleriniñ Rusiye ordusına aluvını halqara uquq bozuluvı dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
