Kyivde mayısnıñ 18-nde saat 12:00-de Qırımtatar halqı genotsidiniñ qurbanlarını añma künü munasebetinen aq qorçalayıcılar «Qırımtatarlarğa qarşı arbiy cinayetler – 1944 senesi sürgünlikni kerçekleştirgenlerniñ üslübi» adlı matbuat konferentsiyasını keçirecek.
«Rusiye işğalcileriniñ Qırımda yapqanları 1944 senesi NKVDniñ yarımadada yapqanlarını tekrarlay. 2014 senesinden başlap yerli faaller ve qırımtatar halqınıñ liderleri Rusiye işğalcileriniñ taqiplerine oğray. Olarnı apiske alalar, sahte «terrorizm» ya da «casuslıq», diversiya ve qanunsız silâlı birleşmelerde iştirak etüv qabaatlavlarına istinaden qanunsız ükümler çıqaralar, mabüslerni imaye imkânından marum eteler, qorantalarğa tuvğanları qayda olğanını aytmaylar», – dep añlattı «KrımSOS» aq qorçalayıdıj teşkilâtı.
Matbuat konferentsiyasında iştirak etecekler:
- Aziz Umerov – Moskva SİZOsında siyasiy sebeplerden qanunsız tutulğan Leniye Umerovanıñ ağası. Genç qıznı qanser hastası babasını baqmaq içün Qırımğa ketkende tutqanlar.
- Adil Girey Ablâtif (online) – «Qırım vatandaş cemiyeti institutı» cemaat teşkilâtınıñ vekili, elâk olğan arbiy Rustem Ablâtifniñ oğlu.
- İlimdar Hocametov – Ukrayına Silâlı quvetleriniñ arbiyi, «Vatan İmayecisi» nişanına nail olğan. Faaliyeti sebebinden Qırımdan ketken faal.
- Yevğen Yaroşenko – «KrımSOS» talilcisi.
- Olğa Skrıpnik – Qırım aq qorçalayıcı gruppasınıñ idare reisi.
Mayısnıñ 18-nde qırımtatarlarnıñ sovetler rejimi tarafından Qırımdan sürgün etilüviniñ 79 yılı tola.
Ukrayına Yuqarı Radasınıñ qararına köre, mayısnıñ 18-i Qırımtatar halqı genotsidiniñ qurbanlarını añma künü dep ilân etildi.
Adet üzre mayısnıñ 18-nde Ukrayınada qırımtatar halqınıñ Qırımdan sürgün etilüviniñ qurbanlarını añma tedbirleri keçirile, lâkin keçken sene Rusiyeniñ Ukrayınağa qarşı tam silâlı istilâsı kütleviy tedbirlerge tesir etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
Qırımtatar halqı genotsidiniñ qurbanlarını añma künü
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
