Qırımtatar Rustem İbadlayevniñ evinde keçirilgen tintüv neticesinde quvetçiler kimseni tutmadılar. Bunı "Qırım birdemligi" cemaat birleşmesi haber etti.
Qayd etilgenine köre, tintüv İçki qasabasında, İbadlayevniñ kiralağan evde keçirilgen.
"Keçirilgen tahqiqat tedbirleri neticesinde kimse tutulmadı. Tintüv evniñ saibine ait edi", - dedi "Qırım birdemligi"niñ mühbiri Zidan Acikelâmov.
Faallerniñ haber etkeni kibi, tintüv vaqtında silâlı adamlar evni sarıp alğanlar. Ev yanında İbalayevniñ qomşuları ve qasaba sakinleri toplanğanlar.
"Malüm olğanı kibi, quvetçilerniñ areketleri evniñ şimdiki sakinlerniñ iç bir malümatı olmağan binanıñ evelki saibine ait edi. "E" merkeziniñ hadimi Nakolay Lapik qorantağa ve toplanğanlarğa bir qaç sual bergen, bundan soñ quvetçiler ketkenler ve kimseni tutmağanlar. Rustemniñ babası haber etti ki, tintüv vaqtında içeride balalar bar edi, şi mdi olarnıñ alı qanaatlendirici", - dep haber ettiler birleşmede.
Qırımtatar halqınıñ aqsaqalları qırımtatar halqına qarşı işkence ve repressiyalarnı toqtatmağatalap ete.
Hatırlatamız, dekabrniñ 17-nde saba Eski Qırımda Rusiye quvetçileri qırımtatarı Nariman Ametovnıñ evini tintti. O, tutuldı, onı belli olmağan yerge alıp kettiler. Narimannıñ ömür arqadaşı Elmaz Ametova, aqayı qırımtatar faalleri Nariman Celâl ve ağa-qardaş Ahtemovlar qabaatlanğan Anğara köyünde «gaz borusındaki diversiyağa» alâqası bar olğanından şübheli sayıla, dep bildirdi. Advokatlar bu malümatnı tasdıqlamay. Soñra faaller «Ametovnıñ bulunğan yeri belli degil», dep bildirdi. O künü Ametov evine qayttı. Soñra FSB hadimleri tarafından elektrik aqımı vastasınen işkencege oğratıldı, dep bildirdi.
Qırım Muhtar Cumhuriyetiniñ prokuraturası Ametovğa qarşı işkence qullanılğanına dair malümat sebebinden qanun ve cenk adetleriniñ bozuluvınen (Ukraina Ceza kodeksiniñ 438-inci maddesiniñ 1-inci qısmı) bağlı cinaiy tahqiqat başlattı.
Rusiye FSBsi Nariman Ametovnıñ işkencege oğratılğanını tefsir etmey.
