Eski Qırımda Rusiye quvetçileri tintüvden soñ qırımtatarı Nariman Ametovnı tuttı, dep haber ete «Qırım birdemligi» cemaat birleşmesi.
«Soy-soplarınıñ malümatına köre, tintüv saba 5:50-de başlandı. Narimannı saba 6:30-da alıp kettiler, evinde tahqiqat tedbirleri ve tintüv daa bitmegen edi, apayı anda edi. Narimannı arqa azbardan çıqardılar ve evde olmağanını cemaat tek tintüv bitken soñ bildi», – dep aytıla haberde.
Faallerniñ malümatına köre, Ametovlarnıñ evinde bütün cep telefonları ve televizor oyun cihazı alındı.
Rusiye quvetçileri şimdilik resmiy tefsir bermey.
Hatırlatamız, dekabrniñ 14-nde Primorskiy qasabasında (Kefe) Rusiye quvetçileri 23 yaşında qırımtatarı Kurtumer Çalgozovnı tutıp, belli olmağan tarafqa alıp ketti. Onıñ cep telefonı alındı. Tintüv vaqtında Çalgozovlar qorantasınıñ bütün azaları evde edi – baba, ana, Kurtumer ve kiçigi 7 yaşında olğan eki qız qardaşı.
