Rusiyeniñ Taganrog şeerindeki mahkeme Aqmescitteki «Hizb ut-Tahrir davasınıñ» mabüsi Seyran Murtazanıñ apis müddetini 3 ayğa, 2020 senesi fevralniñ 15-ne qadar, uzattı. Bu aqta Qırım.Aqiqat mühbiri bildire.
«SİZOdaki tutuv şaraitleri ve aşlarnı Seyran şimdilik şikâyet etmemege qarar aldı. Bugün qavaltı yapmadı, onı qavaltıdan evel çıqarıp, üyleden soñ alıp ketkenler, qavaltı ve üyle yemegini aşamadı», – dep tarif etti advokatı Svetlana Olekseyenko Qırım.Aqiqatqa.
«Qırım birdemligi» cemaat birleşmesiniñ matbuat hızmeti bildirgenine köre, mahkeme, tahqiqat bir çoq tahqiqat ve protsessual tedbirlerni keçirmek kerek dep, apis müddetini uzattı, daa yengil sıñırlav tedbiri belgilense, qabaatlanğan kişi tahqiqat organlarından saqlana bile eken.
Advokat, açıq oturışuv olsun ve Seyran Murtazanıñ mahkeme salonında «akvarium» içinde oturmasın dep, muracaatlar berdi. Mahkeme, ekisini de red etti.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Mezkür dava boyunca 25 qırımtatarı qabaatlana, 23-ü Rostov-na-Donu, Taganrog ve Şahtı SİZOlarına çıqarıldı. Raim Ayvazov Aqmescit SİZOsında tutula, daa bir kişi – Edem Yayaçikov – ğayıp oldı, bulunğan yeri martnıñ 27-nden berli belli degil.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
