Rostov vilâyetiniñ mahkemesi Aqmescitteki ekinci «Hizb ut-Tahrir davasınıñ» eki mabüsi Ruslan Suleymanov ve Erfan Osmanovnıñ apis müddetini uzatuv qararına qarşı berilgen istinaf arizalarını red etti, dep bildire Qırım.Aqiqat mühbiri. Olar 2020 senesi fevralniñ 15-ne qadar SİZOda apiste qalacaqlar.
Qırım.Aqiqat mühbiriniñ bildirgenine köre, Suleymanovnıñ mahkeme oturışuvı qapalı oldı, o, SİZOdan video bağı vastasınen qoşuldı.
«Sıñırlav tedbirini uzatacaq sebep yoq, tahqiqat müddetleri sozula. Ketirgen delillerimizge baqmadan, vilâyet mahkemesi Lenin rayon mahkemesiniñ qararını deñiştirmedi», – dep tarif etti advokat Svetlana Olekseyenko Qırım.Aqiqatqa.
Advokat, Osmanovnıñ sıñırlav tedbiri uzatılğanını izaatlap, tahqiqat müddetleri sozula, dep ayttı.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Mezkür dava boyunca 25 qırımtatarı qabaatlana, 23-ü Rostov-na-Donu, Taganrog ve Şahtı SİZOlarına çıqarıldı. Raim Ayvazov Aqmescit SİZOsında tutula, daa bir kişi – Edem Yayaçikov – ğayıp oldı, bulunğan yeri martnıñ 27-nden berli belli degil.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
