Rusiyede FSB 2018 senesi Qırım yalısı yanında zapt etilgen ve deñişim vaqtında azat etilgen ukrain deñizcilerniñ davasını vaqtınca toqtattı. Bunı Rusiye advokatı Nikolay Polozov haber ete.
"Bugün FSB-niñ Tahqiqat idaresiniñ tahqiqatçısı, ukrain arbiy deñizcilerge qarşı ilk tahqiq etüviniñ vaqtınca toqtatılmasını haber etti. Bu qararnıñ esası ve sebepleri tahqiqat qararınıñ kopiyası alınğanından soñ belli olacaq", - yazdı Facebookta Polozov.
Daa evel Rusiye advokatı Nikolay Polozov, Rusiye quvetçileri 2018 senesi noyabr ayında Qırımnıñ yalısı yanında tutqan ukrain deñizcilerniñ davası şimdilik belgisiz alda olağanını ve deñizciler, azat etilgenlerine baqmadan, alâ daa telüke astında olğanlarını bildirdi.
Noyabr 17-sinde Qırımda Rusiye FSB-siniñ sıñır idaresiniñ matbuat hızmetine atıf etip TASS haber agentligi, zapt etilgen gemilerni noyabr 18-inde berecekler, dep yazdı.
Qırım matbuatınıñ malümatına köre, "Berdânsk" ve"Nikopol" arbiy katerleri ve "Yañı Qapu" buksiri Ukrainağa neytral suvlarda berilmek kerek.
Qırım.Aqiqat daa evel haber etkeni kibi, bazar künü noyabr 17-sinde Keriçte "Genmol" limanınıda tutulğan "Berdânsk" ve "Nikopol" zapt etilgen ukrain katerlerni yollamaqqa azırlap başladılar.
