Rusiye advokatı Nikolay Polozov, Rusiye quvetçileri 2018 senesi noyabr ayında Qırımnıñ yalısı yanında tutqan ukrain deñizcilerniñ davası şimdilik belgisiz alda olağanını ve deñizciler, azat etilgenlerine baqmadan, alâ daa telüke astında olğanlarını bildirdi.
Bunı Qırım.Aqiqatqa advokat Polozov aytıp berdi.
Onıñ aytqanına köre, bu dava boyunca tahqiqatnı yanvarniñ 25-inece uzattılar ve o kelecek aftanıñ soñunda bite.
"Biz tahqiqattan yañı malümatnı bekleymiz, çınki biz dava malümatınen tanışmaqnı devam etmelimiz, tahqiqat işlerini ğayrıdan başlamalımız ya da ilk tahqiqatnıñ müddetini uzatmalımız", - añlattı advokat.
Bundan ğayrı Polozov, deñizciler ve gemiler qaytarılğanı içün, şimdi bu davağa cemiyetniñ meraqı olmağanını qayd etti.
"Amma ep bir bu işni soñunace yetkizmek kerek. Maqsadımız - deñizcilerniñ cinaiy davasını toqtatmaqtır. Simdi olar ep bir telüke astındalar. Yarın Rusiye akimiyeti olarnı qıdıruvğa ilân etmeyceklerine kefalet yoq. Denizciler bir de bir memleketke barsa, olarnı tevqif ete bileler", - dedi Polozov.
Noyabr 17-sinde Qırımda Rusiye FSB-siniñ sıñır idaresiniñ matbuat hızmetine atıf etip TASS haber agentligi, zapt etilgen gemilerni noyabr 18-inde berecekler, dep yazdı.
Qırım matbuatınıñ malümatına köre, "Berdânsk" ve"Nikopol" arbiy katerleri ve "Yañı Qapu" buksiri Ukrainağa neytral suvlarda berilmek kerek.
Qırım.Aqiqat daa evel haber etkeni kibi, bazar künü noyabr 17-sinde Keriçte "Genmol" limanınıda tutulğan "Berdânsk" ve "Nikopol" zapt etilgen ukrain katerlerni yollamaqqa azırlap başladılar.
Daa evel Ukraina prezidenti Volodımır Zelenskıynıñ yardımcısı Andriy Yermak, 2018 senesi noyabrde Rusiye silâ yardımınen zapt etken Ukraina Arbiy Deñiz Quvetleriniñ üç gemisiniñ Ukrainağa qaytarılmasınıñ soñki basamağı aqqında aytıp berdi.
"Bıltır noyabrde zapt etilgen "Nikopol" ve "Berdânsk" arbiy katerlerini, "Yañı Qapu" buksiriniñ qaytarılması soñki basamağına keldi", - dedi o HB matbuatına.
