Rusiye mahkemesi tarafından 13 yılğa azatlıqtan marum etilgen "Qırım musulmanları davasınıñ" mabüsi, qırımtatar faali Ruslan Nagayev endi bir aftadan berli RF territoriyasındaki Arhangelsk hastahanelerinden birinde buluna. Bu aqta Qırımtatar resurs merkezi öz menbalarınaatıf etip yaza.
Berilgen malümatqa köre, erkek hastahanege alındı, amma ekimler ameliyat kerekligi aqqında tam bir malümat berip olamaylar. Ameliyat yapılacaqmı-yoqmı daa belli degil.
Belli bir tibbiy plan olmağanına baqmadan, tuvğanlarına Ruslanğa kerekli şeyler ile poştalarnı bermege izin berildi.
Avgust ayında "Qırım birdemligi" cemaat birleşmesi, "Qırım musulmanları davası" boyunca Rusiye tarafından 13 yılğa azatlıqtan marum etilgen Ruslan Nagayevni Rusiyeniñ Çelâbinsk vilâyetindeki Verhneuralsk şeeriniñ 1-nci apishanesi yanındaki apishanege alıp kettiler, dep bildirgen edi. Onıñ acele ameliyatqa ihtiyacı bar edi.
Qırımtatarnıñ şimdi iltihap alına keçken hronik hastalığı bar.
Ruslannıñ qadını Zarema Nagayevanıñ aytqanına köre, aqayını endi eki kere apishanege alıp ketkenler, amma tek hastalıq alâmetlerini yımşatqanlar. Teşkerüv yapa bilecek tar mütehassıs Ruslannı öyle de baqmağan.
2019 senesi iyünniñ 10-nda Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ sekiz kişi tutuldı: Ruslan Nagayev, Eldar Kantemirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye akimiyeti Nagayev ve Umerovnı Rusiyede terroristik tanılğan, amma bir çoq memlekette milliy qanunlar seviyesinde sıñırsız faaliyet köstergen «Hizb ut-Tahrir» islâm siyasiy firqasınen alâqaları bar dep qabaatladı.
2021 senesi avgustnıñ 16-nda Cenübiy okrugınıñ arbiy mahkemesi «Aluştadaki Hizb ut-Tahrir gruppasınıñ» mabüsleri Ruslan Nagayev, Eldar Kantimirov, Ruslan Mesutov ve Lenur Halilovnıñ ükmüni çıqardı. Erkekler terror faaliyetinde qabaatlanıp, 13, 12 ve 18 yıl sert rejimli koloniyada qalmasına üküm etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
