Rusiyede koronavirus hastası olmagan iç bir bölge qalmadı, bunı Azatlıq Radiosı haber ete.
Cumaaqşamı künü Altay ükümetiniñ matbuat hızmeti ilk koronavirus adisesi aqqında haber etti - Onguday rayonında, qomşu bölgeden musafirleri kelip-ketken qadın hastalandı. Birinci analizler infektsiyanıñ bar olmasını tasdıqladı.
Buñace Altay - iç bir koronavirus adisesi olmağan Rusiyeniñ yekâne bölgesi edi.
Aprelniñ 16-nda saba Qırımnıñ Aqmescit ve Aqşeyh rayonlarında üç yañı koronavirus hastası qayd etildi. Aqyarda sekiz koronavirus hastası qayd etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
