Rostov-na-Donunıñ Oktâbrskiy rayon mahkemesi mayısnıñ 14-nde martnıñ 27-nde Qırımda keçirilgen kütleviy tintüvler neticesinde tutulğan Aqmescitteki ekinci «Hizb ut-Tahrir davasınıñ» daa üç mabüsiniñ tevqif müddetini üç ayğa uzattı. Cemal Gafarov, Erfan Osmanov ve Asan Yanikov avgustnıñ 15-ne qadar SİZOda bulunacaqlar. Bu qararnı qadı Stanislav Vinokur çıqardı, dep bildire Qırım.Aqiqat mühbiri.
Gafarovnıñ advokatı Rifat Yahin Qırım.Aqiqat mühbirine bildirgenine köre, müvekkiliniñ sağlıq vaziyeti fenalaşmaqta.
«Qırım Cumhuriyetindeki FSB idaresiniñ tahqiqatçısı Cemal Gafarovnıñ tibbiy teşkerüvinen bağlı muracaatımnı daa aprelniñ 3-nde qanaatlendirse de, bugünge qadar bir şey yapılmadı. Müvekkilim bulunğan tahqiqat izolâtorınıñ hadimleri esnasnı soza. Bugün Cemal ağa SİZOda bulunğan 49 kün içinde ilk sefer maña özüni yaramay is etkenini ayttı. Mahkeme Gafarovnıñ ciddiy hastalıqlarını isbatlağan vesiqalarğa baqmadan onıñ izolâtorda tutuluvını uzattı», – dep qayd etti advokat.
Oturışuv qapalı şekilde keçirildi, qarar seslendirilgende tek soy-soplarğa kirmege izin berildi.
Mayısnıñ 14-nde Rusiye Rostov vilâyetiniñ mahkemeleri Aqmescitteki ekinci «Hizb ut-Tahrir davasınıñ» diger doquz mabüsiniñ apis müddetini üç ayğa uzattı: Akim Bekirov, Seytveli Seytabdiyev, Osman Arifmemetov, Servet Gaziyev, Akim Bekirov, Seytveli Seytabdiyev, Osman Arifmemetov, Servet Gaziyevniñ. Qırımda bulunğan Raim Ayvazovnıñ da tevqif müddeti uzatıldı.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Mezkür dava boyunca 25 qırımtatarı qabaatlana, 23-ü Rostov-na-Donu, Taganrog ve Şahtı SİZOlarına çıqarıldı. Raim Ayvazov Aqmescit SİZOsında tutula, daa bir kişi – Edem Yayaçikov – ğayıp oldı, bulunğan yeri martnıñ 27-nden berli belli degil.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
