Rusiye faalleri Aqmescit SİZOsında tutulğan qırımtatar faali Edem Bekirovğa kerekli tibbiy yardım kösterilsin dep, Rusiye sağlıq naziri Veronika Skvortsovağa muracaat etti. Faaller Bekirovnı «qorçalamaq» çağıruvınen imzalar toplay. Bu aqta faal Konstantin Kotov Qırım.Aqiqatqa bildirdi.
«Bekirovnıñ vaziyetinde Sağlıq nazirligi yardımcı olur, dep tüşündik: olar mütehassıs olaraq oña tedaviylev kere olğanını añlamaq kerekler. SİZOda kösterilgen yardımnıñ faydası yoq», – dedi o.
Faalniñ bildirgenine köre, change.org saytında petitsiya derc etildi, anda ekim Olga Mazurova Bekirovnı SİZOdan çıqarmağa çağıra.
«Petitsiya müellifi ekim ola ve ekimlerge muracaat ete. Petitsiya Adliye nazirligine de yollanıldı. Adliye nazirligi Bekirovnıñ kerekli tibbiy yardım almasına izin bermeli. Daa soñra anda da muracaat etermiz, dep tüşünem. Moskalkovağa bir qaç ay evelsi muracaat etken edi: lâyıq bir cevap olmadı», – dedi Kotov.
Rusiye Sağlıq nazirligi faallerniñ muracaatını daa izaatlamadı.
Bundan evel Qırım mahkemesi qırımtatar faali Edem Bekirovnı apiste qaldırdı.
İyünniñ 11-nde Avropa insan aqları mahkemesi Qırımda silâ ve patlayıcı maddelerni saqlağanında qabaatlanğan qırımtatar faali Edem Bekirovnıñ davası boyunca qarar çıqardı. Mahkeme onıñ hastahanege acele yatqızılmasını talap etti.
Daa evel Avropa insan aqları mahkemesiniñ qararına baqmadan, Qırımdaki Rusiye Federal telükesizlik hızmeti idaresiniñ üyken tahqiqatçısı İvan Romanets işğal etilgen Qırımnıñ Aqmescit SİZOsında tutulğan qırımtatar faali Edem Bekirovnı hastahanege yatqızmağa razı olmağanını bildirgen edi.
Qırımnıñ Rusiye prokuraturası FSBniñ Bekirovnı hastahanege avuştırmamaq qararına qoltuttı.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
