Qırımnıñ Qarasuvbazar rayonında rusiye quvetçileri "Qırım birdemligi" teşebbüsiniñ koordinatorı Mustafa Seydaliyevniñ qayd etilgen yerine keldi. Bunı teşebbüs Facebook saifesinde bildire.
Seydaliyev qayd etilgen yerinde yaşamağanı içün, 2020 senesi mayıs 1-5-inde qanunsız aktsiyalarda iştirak etmemesi aqqında ihtar vesiqasını anasına oqudılar.
"Anamnı qısqada sorğuladılar. Meni ne vaqıt soñki kere kördi, yaşağan adresimni bilemi. Bu afta Qarasuvbazarda olsam, olar kireyim, dep ayttılar", - aytıp berdi Mustafa Seydaliyev.
Rusiye kontrolindeki Qırım prokuraturasınıñ hadimleri qırımlı Abdureşit Cepparovğa 2020 senesi mayısnıñ 1-nden 5-ne qadar qanunsız aktsiyalarda iştirak etmek yasaq olğanına dair tenbi vesiqasını berdi.
Qırımnıñ Seyitler rayonında martnıñ 26-nda Rusiye politsiyası qırımtatarlarnı 2020 senesi mayısnıñ 1-nden 5-ne qadar qanunsız aktsiyalarda iştirak etmek yasaq ola, dep tenbiledi.
2019 senesi dekabrniñ 6-nda Qırımtatar Milliy Meclisiniñ reisi Refat Çubarov «Dünya – zorbalıq ve işğalge qarşı. Menlik yürüşi» halqara zorbalıqsız barışıq aktsiyası azırlana ve keçirilecek, dep ilân etti. Aktsiya vaqtında faller memuriy sıñırdan keçip, Qırımğa kirecek ola. Aktsiya mayısnıñ 3-nde keçirilecektir.
Çubarov, Kreml, «Qırım yürüşi» arfesinde qırımtatarlarnı qorquzmağa tırışa, dep ayta.
Rusiye Tış işler nazirligi, Qırımtatar Milliy Meclisi ilân etken «Qırım yürüşi» aktsiyasını «provokatsiya» dep adlandırdı.
