Rusiye kontrolindeki Qırım prokuraturasınıñ hadimleri qırımlı Abdureşit Cepparovğa 2020 senesi mayısnıñ 1-nden 5-ne qadar qanunsız aktsiyalarda iştirak etmek yasaq olğanına dair tenbi vesiqasını berdi, dep bildire Qırım.Aqiqat mühbiri.
Cepparov, tenbi berilüvini Kyivde mayısnıñ 3-ne planlaştırılğan «Qırım yürüşinen» bağlay.
«Bugün evde musafirimnen oturdım, oña aq qorçalayıcı meselelerde mesleat berdim, ve pencereden politsiya hadimlerini kördim. Başta karantinnen bağlı dep tüşündim, belki, profilaktik bir subet olacaq dedim. Çıqsam, politsiya zabiti ve prokuraturadan bir qız turğanını kördim, kâğıtları azır edi», – dep tarif etti Cepparov.
Aq qorçalayıcınıñ qayd etkenine köre, Rusiye quvetçileriniñ malümatına köre, o, böyle tedbirlerniñ iştirakçisi ya da teşkilâtçısı ola.
«Kyivde Qırımtatar Milliy Meclisiniñ teşebbüsinen Menlik yürüşi teşkil etilgeninen bağlaydırlar. Er birimiz aqqında laf ketkenini, menligimiz aqqında aytılğanını añlap, bu tedbirde iştirak etmeyik dep, tenbilemege istegendirler», – dedi Cepparov.
Qırımnıñ Seyitler rayonında martnıñ 26-nda Rusiye politsiyası qırımtatarlarnı 2020 senesi mayısnıñ 1-nden 5-ne qadar qanunsız aktsiyalarda iştirak etmek yasaq ola, dep tenbiledi.
2019 senesi dekabrniñ 6-nda Qırımtatar Milliy Meclisiniñ reisi Refat Çubarov «Dünya – zorbalıq ve işğalge qarşı. Menlik yürüşi» halqara zorbalıqsız barışıq aktsiyası azırlana ve keçirilecek, dep ilân etti. Aktsiya vaqtında faller memuriy sıñırdan keçip, Qırımğa kirecek ola. Aktsiya mayısnıñ 3-nde keçirilecektir.
Çubarov, Kreml, «Qırım yürüşi» arfesinde qırımtatarlarnı qorquzmağa tırışa, dep ayta.
Rusiye Tış işler nazirligi, Qırımtatar Milliy Meclisi ilân etken «Qırım yürüşi» aktsiyasını «provokatsiya» dep adlandırdı.
