Aqmescit rayonınıñ Mamaq köyünde avgustvnıñ 17-nde Rusiye quvetçileri sabadan yerli imam Raif Fevziyeviñ evinde tintüv keçireler, dep haber ete Edem Semedlâyev.
«Qırım birdemligi» cemaat birleşmesiniñ malümatına köre, imamnıñ evi yanında bir qaç mikroavtobus bar, azbarnı balaklava ve maskalı adamlar sarıp alğan, evge kimseni kirsetmeyler.
«Saba saat beşten Raifniñ evi yanında turam, evge meni kirsetmeyler. OMON yanına kelip, advokat olğanımnı ve tahqiqat tedbirlerinde iştirak etmege kelgenimni bildirdim, amma meni yibermeyler ve iç bir şey añlatmaylar. Quvetçilerniñ bu areketlerine prokuraturağa şikâyet berecegim», – dedi Semedlâyev.
Qırımdaki Rusiye qanınun qoruyıcı organlarnı vaziyetni tefsir etmeyler.
Qırım.Aqiqat tafsilâtlarnı ögrenmege tırışa.
Hatırlatamız, iyülniñ 22-nde saba Rusiye quvetçileri 57 yaşında Ali İbragimov ve 27 yaşında oğlu Mustafa İbragimovnıñ evini tintti.
Qırım Muhtar Cumhuriyeti ve Aqyar prokuraturası Rusiye quvetçileriniñ Kezlevde 57 yaşında Ali İbragimov ve 27 yaşında oğlu Mustafa İbragimovnıñ evinde keçirgen tintüvleri sebebinden cinaiy tahqiqat başlatıldı, dep bildirdi.
Bundan evel Ukraina ombudsmanı Lüdmila Denisova halqara toplulıqnı Rusiye quvetçileriniñ yapqanlarına cevap bermesine çağırdı.
Qırımtatar Milliy Meclisiniñ reisi Refat Çubarov Rusiye quvetçileriniñ Kezlevde qırımtatarı Ali İbragimovnıñ evinde keçirgen tintüvini «qırımtatarlarnı ayrı qorquzuv şekli» ve «esas insan aqlarını ihmal etüv» dep adlandırdı.
