QIRIM – Qırımtatar Milliy Meclisi işğal etilgen Qırımda qırımtatarlarnıñ Rusiye ordusına seferber etilüviniñ azırlıq alâmetleri bar, dep haber ete. Qırım.Aqiqat, Qırımnıñ tamır halqı içün vaziyetni aydınlatmağa istedi.
Qırımtatar Milliy Meclisiniñ reisi Refat Çubarovnıñ malümatına köre, Rusiye quvet organlarından memurlar Rusiye tarafdarı Qırım ve Aqyar musulmanları müftisi Emirali Ablayevnen gizli körüşüvler keçirip, qırımlı musulmanlarnı Rusiye ordusına seferber etilüvini quvetleştirmege istey.
«Belli olğanına köre, Emirali Ablayev, işandırğanı kibi, «qırımtatarlarnı «mahsus arbiy operatsiyada» iştirak etmege celp etecek tedbirlerni teşkil etüv vazifesini aldı», – dedi Çubarov.
Qırımtatar resurs merkeziniñ idare reisi, Qırımtatar Milliy Meclisiniñ tış bağlar ve aq qorçalayıcı faaliyet idaresiniñ reisi Eskender Bariyev, onıñ malümatına köre, Qırımda yañı askerlikke aluv kampaniyası çerçivesinde Rusiye akimiyeti 15 biñge qadar qırımlını almağa azır, dep bildirdi.
«Elimizdeki ilk malümatqa köre, aprelniñ 20-nden başlap qısmiy seferberlikni ilân ete ya da quvetleştire bile», – dep tarif etti Bariyev. Onıñ qayd etkenine köre, qısmiy seferberlik çerçivesinde Qırımda qırımlı musulmanlarğa celpnameler zaten berile.
Qırımtatar Milliy Meclisiniñ reis muavini İlmi Umerovnıñ fikirince, Kreml işğal etilgen Qırımda qırımtatarlarnıñ Ukrayına tarafdarı olaraq qalğanına açuvlana.
Putin razı olmağanımız içün intiqam almağa devam eteİlmi Umerov
«Qırımtatarlarnıñ Rusiye ordusına qoşulmağa istemegenine Emirali Ablayevniñ fikri, ebet, pek tesir etmey. Vaziyetni tek Ukrayınağa qarşı cenkleşmege razı olmağanları içün repressiyalarnıñ quvetleşmesi deñiştire bile. Cenkleşmege ketecek qırımtatarlarnıñ sayısı cebedeki vaziyetke tesir etmeycek, çünki biz çoq degilmiz. Amma tamır halqnıñ Qırımdan çıqmasınıñ yañı dalğasına yol aça bile, bu da Kremlniñ bir planı, halqımızğa qarşı munasebeti belli. Putin razı olmağanımız içün intiqam almağa devam ete», – dep ayttı fikrini Qırım.Aqiqatqa Meclis reisiniñ muavini.
#LiberateCrimea halqara areketiniñ faali, Qırımtatar resurs merkeziniñ eksperti, Ukrayına Silâlı quvetleriniñ askeri Serğiy Parhomenko Qırım.Aqiqatqa qayd etkenine köre, Qırımda seferberlik mıtlaqa quvetleştirilecek.
«Ukrayınada 450 biñlik arbiylerden işğalci gruppirovkanı ve cezalayıcı bölüklerni tutmaq içün yañı yedekler yapılmalı, seferberlik keçirilmeli, ğayıplar toldurılmalı. Qırımtatarlar arasında seferberlikke qoltutuv teşviqatı yapılacaq, faydası olmasa, seferberlik zornen yapılacaq – iç bir şübhe yoq. Qırımda yañı seferberlik dalğası ne içün qırımtatarlarnen bağlı şaşırtmay. Rusiyeniñ cenkte Kremlge qoltutmağan, yani rus olmağan halqlarnı yoq etüv siyasetine uya. Lâkin sahte müftiniñ celp etilüvi qırımtatarlarnıñ göñülli seferberligini arttırmaycaq. Ablayev – tamır qırımtatar halqınıñ ekseriyeti içün bir qoqla, bu meselede diniy mertebesi oña bir fayda ketirmeycek», – dedi ekspert.
Qırımlı cemaatçı, Yaltalı musulman Ragim (muarririyet telükesizlik maqsadınen soyadını aytmay – QA) emin ki, müfti cenkke seferber olmağan istegenlerniñ sayısını arttıracaq qadar qırımlı musulmanlarğa tesir etip olamay.
«Umumen Qırımdaki cemiyet bir de bir şahıs ya da qurulışlarnıñ belli bir areketlerge çağırğanına pek cevap bermey. İnsanlar çağıruvlarğa seslensin dep, bunı cemaat işanğan ve ürmet etken şahıslar yapmalı. Mında Qırımdaki seferberlikke Rus pravoslav kilsesiniñ ortodokslarnı celp etüv «muvafaqiyetlerine» baqmaq kerek – kelgen malümatqa köre, muvafaqiyetli degiller. Dinden uzaq olğan insanlar añlaşma tize. Müftilikniñ çağıruvları bir şey deñiştirmey ve bir neticesi olmaycaq, dep tüşünem. Laf ettik, işaretledik ve dağıldıq degen dayın», – dep ayttı fikrini Qırım.Aqiqatqa cemaatçı.
Kefeli qırımtatar faali Osmannıñ (muarririyet telükesizlik maqsadınen soyadını aytmay – QA) malümatına köre, qırımtatarlarnıñ ekseriyeti Rusiye ordusında askerlik yapmamağa tırışa.
«Emirali Ablayev ya da başqa birisi bu meselede qırımtatarlarğa tesir etip olamaz. Şimdi bile – yaşı kelişken pek çoq genç Qırımdan ketti, bu yıl Rusiye ordusına oğramamaq içün. Ketmegenler – tibbiy sebeplerden askerlik yapmamaq içün imkân qıdıra», – dep ayttı faal Qırım.Aqiqatqa.
Aqmescitli qırımtatar cemaatçı Aliniñ fikirince (muarririyet telükesizlik maqsadınen soyadını aytmay – QA), müfti bu vazifeni faal şekilde yapsa, böyle tesirniñ qurbanları olacaq.
«Şübhesiz, din kütkenlerge bir tesiri bardır. Bu tesir ne qadar küçlü tek neticelerine baqıp añlamaq mümkün. Halq içün menfiy bir netice körmeyim, amma bu tesirniñ ayrı qurbanları, ebet, olacaq», – dep qayd etti Qırım.Aqiqatqa cemaatçı.
Soñki on yılda tahminen 50 biñ qırımtatarı Qırımdan ketmege mecbur oldıRefat Çubarov
2022 senesi sentâbr ayında Rusiye akimiyeti Ukrayına ile cenkke qısmiy seferberlik ilân etti. Resmiy malümatqa köre, tahminen 300 biñ insan çağırıldı. Seferberlik buyruğı işlemege devam ete. «KrımSOS» aq qorçalayıcı teşkilâtınıñ esaplarına köre, Rusiye akimiyeti ilân etken seferberlikniñ ilk künlerinde bile Qırımda celpnamelerniñ 90%-ı qırımtatarlarğa keldi.
Aq qorçalayıcılarnıñ malümatına köre, tahminen 30 biñ qırımtatarı «qısmiy seferberlik» sebebinden Qırımnı terk etmege mecbur oldı.
Qırımtatar Milliy Meclisiniñ reisi bildirgenine köre, soñki on yılda tahminen 50 biñ qırımtatarı Qırımdan ketmege mecbur oldı.
MALÜMAT: Ukrayınağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayına şimalinde faal olğanını toqtattı, dep bildirdi. Tezden Ukrayına akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayınağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
