«Grani.ru» Rusiye muhalifet neşiri Aqmescitteki ekinci «Hizb ut-Tahrir davasınıñ» mabüsi, qırımlı vatandaş jurnalisti Remzi Bekirovğa birdemlik köstergenini bildirdi.
«İlhaqtan soñ Qırım informatsion qara çuqurğa çevirildi. Avropada işğal altındaki topraqta repressiyalar keçirile, kütleviy haber vastaları olarnı pek az aydınlata. Esas mühbirlik işini esasen taqiplerniñ qurbanları özleri yapmağa mecbur. Mında jurnalistikanı aq qorçalayıcılıq ve faaliyetten ayırmağa mümkün degil. Bitmegen tintüv, apis cezaları ve uydurılğan davalar boyunca mahkemeler – bütün bularnı bizge qırımtatar vatandaş jurnalistleri tarif ete. Qısqa bir müddet içinde olar kerçekten mütehassıs oldılar. Ve, elbette, özleri zarar kördi», – dep aytıla haberde.
Neşir «Qırım birdemligi» cemaat birleşmesiniñ faali Nariman Memedeminov, blogerler Osman Arifmemetov ve Rustem Şeyhaliyev ve «Grani.ru» mühbiri Remzi Bekirovnıñ apiske alınğanı aqqında hatırlattı.
«Zenaatdaşlarımıznıñ acele azat etilmesini talap etemiz. Jurnalist birleşmeleriniñ olarnı qorçalamasına çağıramız», – dep aytıla neşirniñ Facebook saifesinde.
Rostov-na-Donu Leninskiy rayon mahkemesiniñ qadısı Vladimir Barvin Aqmescitteki ekinci «Hizb ut-Tahrir davasınıñ» mabüsi, qırımlı vatandaş jurnalisti Remzi Bekirovnıñ SİZOda tutuluv müddetini üç ayğa uzattı. Bekirov avgustnıñ 15-ne qadar Rostov-na-Donu tahqiqat izolâtorında qalacaq.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Mezkür dava boyunca 25 qırımtatarı qabaatlana, 23-ü Rostov-na-Donu, Taganrog ve Şahtı SİZOlarına çıqarıldı. Raim Ayvazov Aqmescit SİZOsında tutula, daa bir kişi – Edem Yayaçikov – ğayıp oldı, bulunğan yeri martnıñ 27-nden berli belli degil.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
