Rostov-na-Donu Leninskiy rayon mahkemesiniñ qadısı Vladimir Barvin Aqmescitteki ekinci «Hizb ut-Tahrir davasınıñ» mabüsi, qırımlı vatandaş jurnalisti Remzi Bekirovnıñ SİZOda tutuluv müddetini üç ayğa uzattı. Bu aqta mahkemede olğan faaller Qırım.Aqiqat mühbirine haber etti.
Bekirov avgustnıñ 15-ne qadar Rostov-na-Donu tahqiqat izolâtorında qalacaq.
Qabaatlav tarafınıñ malümatına köre, Bekirov azatlıqta olsa, ceza ağırlığından qorqıp, ilk tahqiqat ve mahkemeden saqalana, şaatlarnı qorquza, delillerni yoq ete bile. Tahqiqatnıñ «yeterli ve isbatlanğan şübheleri» bar eken.
Bundan ğayrı, «Hizb ut-Tahrir teşkilâtında faal rol alıp, cemaat telükesizligi içün zararlı ola bilecek faaliyetnen oğraşmağa devam etmesi mümkün».
Bekirovnıñ advokatı Edem Semedlâyev mahkemeden qabaat tarafınıñ muracaatını qanaatlendirmemesini rica etti, çünki Bekirov Ukraina vatandaşı ve siyasiy mabüs ola. O, müvekkiliniñ yaşağan yeri Mamaq (Stroganovka) köyünde ev apsinde bulunmasını istedi. Bekirov Rostov-na-Donu izolâtorında tutulmasını «sürgünlik» dep sayğanını bildirdi.
Bekirov ve bu davanıñ diger mabüsleri – cemaat imayecisi Riza İzetov, göñülli ve faal Ruslan Suleymanov, göñülli Şaban Umerovğa – qoltutmaq içün Qırımdan Rostov-na-Donuğa 20 kişi keldi. Salonğa 12 diñleyici kirsetildi. Oturışuvda Ukraina konsulı Sergey Vdoviçenko da bar edi.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Mezkür dava boyunca 25 qırımtatarı qabaatlana, 23-ü Rostov-na-Donu, Taganrog ve Şahtı SİZOlarına çıqarıldı. Raim Ayvazov Aqmescit SİZOsında tutula, daa bir kişi – Edem Yayaçikov – ğayıp oldı, bulunğan yeri martnıñ 27-nden berli belli degil.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
