Noyabrniñ 29-nda Rusiyeniñ Krasnodar şeeriniñ Dörtünci umumiy yurisdiktsiya mahkemesi ğıyabiy tarzda mahkemelenip üç yıl apis ve para cezasına mahküm etilgen qırımtatar halqınıñ lideri Musatafa Cemilevniñ ükmüni deñiştirmedi. Bunıñ aqqında Rusiye mahkemesiniñ saytında haber etile.
"Netice: şikâyet qanaatlendirilmegen, temyiz etilgen mahkeme qararları deñiştirilmegen", - dep haber etile.
Cemilev Rusiye Ceza qanunnamesiniñ 224-ünci maddesine binaen (nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması), Rusiye Ceza qanunnamesiniñ 322-nci maddesiniñ 3-ünci qısmına binaen (Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv) ve Rusiye Ceza qanunnamesiniñ 222-nci maddesiniñ 1-inci qısmına binaen (silânı qanunsız alıp saqlav) qabaatlanıp mahkemelendi.
Mudafaa tarafı Cemilevniñ ükmyuni qanunsız saya, onıñ lâğu etilmesini ve qabaatsız tanılmasını talap ete.
Mayıs ayında Rusiye kontrolindeki Qırım Yuqarı mahkemesi qırımtatar halqınıñ lideri Mustafa Cemilevniñ ğıyabiy ükmüni sertleştirip, 3 yıl apis cezası ve para cezasını berdi.
Aprelniñ 22-nde Rusiyeniñ nezaretinde olğan Ermeni Bazar şeer mahkemesi qırımtatar haqlınıñ milliy lideri Mustafa Cemilevge ğıyaben üküm çıqardı. O qabaatlı tanıldı, amma aqlama etilmegen esaslarğa köre azat etildi.
Bundan evel Rusiye qabaatlavı qırımtatar halqınıñ lideri Mustafa Cemilev içün «Rusiye sıñırını qanunsız keçüv» maddesine istinaden üç yıl yaşav tarzı koloniyasında qalmasını istedi.
Qırım MC ve Aqyar şeeriniñ prokuraturası haber etkenine köre, qırımtatar halqınıñ milliy lideri Mustafa Cemilevni Qırımda taqip etken rusiyeli mahkemicelerge qarşı Ukrayina mahkemesine 20 qabaatlav aktını yolladı.
Ukraina prezidentiniñ Qırım Muhtar Cumhuriyetindeki temsilciligi Mustafa Cemilevge qarşı Rusiye cinaiy davasını «siyasiy taqip» dep adlandırdı.
Qırımda 2021 senesi martnıñ 5-nde mahkeme oturışuvında belli olğanına köre, Cemilevniñ Qırımğa kiriş yasağı 15 yılğa – 2034 senesi martnıñ 5-ne qadar uzatıldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Mustafa Cemilev
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
