Rostov-na-Donu Kirov rayon mahkemesiniñ qadısı Elmira Fadeyeva Aqmescitteki ekinci «Hizb ut-Tahrir davasınıñ» mabüsleri Akim Bekirov, Seytvali Seytabdiyev, Osman Arifmemetov ve Servet Gaziyevniñ SİZOda qaluv müddetini üç ayğa uzattı. Olar avgustnıñ 15-ne qadar Rostov-na-Donu tahqiqat izolâtorında qalacaqlar, dep bildire Qırım.Aqiqat mühbiri.
Qabaat tarafınıñ bildirgenine köre, olar azatlıqta olsa, ceza ağırlığından qorqıp, ilk tahqiqat ve mahkemeden saqlana, şaatlarnı qorquza, delillerni yoq ete bile. Tahqiqatnıñ «yeterli ve isbatlanğan şübheleri» bar eken.
İmaye, qabaat tarafınıñ muracaatını red etmege rica etti, çünki dava mabüsleri Ukraina vatandaşları ve siyasiy mabüs ola. Qırımda qayd olğan yerleri boyunca ev apsine alınmaları istenildi.
Oturışuv qapalı şekilde keçirildi, salonğa ne soy-soplar, ne diñleyciler kirsetildi. Tahminen 50 insan bugün bu mahkemede davaları baqılacaq sekiz mabüske qoltutmaq içün Qırımdan keldi.
«Balalarımızğa qoltutmaq içün mahkemege keldik. Amma soñki daqqada oturışuv qapalı olğanını aytqanlar. O qadar vaqıt coyıp, uzaqtan keldik, ögümizde ise qapularnı qapatqanlar», – dep tarif etti Akimniñ anası Lilâ Bekirova.
Rostov vilâyetiniñ Şahtı şeer mahkemesinde davanıñ daa dört mabüsi İzzet Abdullayev, Tofik Abdulgaziyev, Yaşar Muyedinov ve Alim Karimovnıñ tevqif müddeti uzatıldı.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Mezkür dava boyunca 25 qırımtatarı qabaatlana, 23-ü Rostov-na-Donu, Taganrog ve Şahtı SİZOlarına çıqarıldı. Raim Ayvazov Aqmescit SİZOsında tutula, daa bir kişi – Edem Yayaçikov – ğayıp oldı, bulunğan yeri martnıñ 27-nden berli belli degil.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
