Rostov-na-Donu Cenübiy okrugınıñ arbiy mahkemesi noyabrniñ 22-nde Bağçasaraydaki ekinci «Hizb ut-Tahrir davasınıñ» mabüsleri – Ernest İbragimov ve Oleg Fedorovnıñ apiste qaluv müddetini uzattı. Bu aqta «Qırım birdemligi» cemaat birleşmesi haber ete.
Apis müddeti üç ayğa – fevralniñ 28-ne qadar uzatıldı.
Prokurornıñ aytqanına köre, böyle sıñırlav tedbiriniñ saylanması içün cemaat telükesizligi içün havf ve «apisni uzatuv içün eski delillerniñ aynı qalması» sebep oldı.
Qırımlılarnıñ imayecisi Lilâ Gemeci qabaatlayıcınıñ deliline itiraz bildirdi. O, qabaatlayıcı apis müddetini uzatmaq içün yeterli sebep köstermedi, dep israr etti.
«Bundan ğayrı, bütün deliller endi toplandı, şunıñ içün Fedorov ve İbragimov tahqiqatqa tesir etip olamaylar. Advokat, İbragimov dört kiçik balanı baqa, Fedorovnıñ esli-başlı anası bar, dep hatırlattı. Mabüslerniñ bütün mülki Qırım cumhuriyetinde buluna. Şunıñ içün memleketni terk etmek niyetleri yoq. Gemeci, mabüsler tanığan gizli şaatlar içün de telüke yoq, dep qoştı. Er kün olarnı İbragimov ve Fedorovnıñ soy-sopları şeerde körip, uzaqtan keçe», – dep aytıla haberde.
Gemeciniñ delillerine tayin etilgen advokat da qoltuttı.
«O, Fedorov Qırımda daima yaşay, «saqlanmağa» niyeti yoq, dep diqqatnı celp etti. Bundan ğayrı, imayeciniñ fikirince, maddeniñ ağırlığı apis müddetiniñ uzatıluvı içün sebep olamaz», – dep bildirdi «Qırım birdemligi».
İmaye ve qabaatlanğanlarnıñ delillerine mahkeme qulaq asmadı ve qabaatlayıcınıñ muracaatına qoltuttı.
Fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi. Tahqiqat tedbirleri keçirilgende tutulğan insanlarnıñ tuvğanlarına berilgen malümatqa köre, olar Rusiye Ceza kodeksiniñ 205.5 maddesine istinaden (Terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv – muar.) qabaatlana.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
