Rusiye arbiyleri oktâbrniñ 2-nde aqşam Harkivge bombalar endirdi, dep bildire şeer yolbaşçısı İğor Terehov. On insan yaralandı, şu cümleden üç yaşında bir qızçıq.
Harkiv vilâyetiniñ arbiy memuriyetiniñ yolbaşçısı Oleğ Sineğubovnıñ malümatına köre, darbe neticesinde Saltovka rayonında beş qatlı ev zarar kördi, üçünci ve dörtünci qatlar arasında yanğın çıqtı. Bundan da ğayrı, 10 maşna yandı.
Ukrayina prezidenti Volodımır Zelenskıy, qurtaruv ameliyatı devam etkenini bildirdi. "Rusiyeniñ böyle darbeleri toqtatılsın dep, Ukrayina dünya ve ortaqlardan kerekli ve, eñ esası, yeterli yardım almalı. Er bir lider ne yapmaq kerek olğanını yahşı bile. Qattı olmaq kerek", — dep yazdı o.
RF reberligi, Rusiye ordusı büyük cenk vaqtında Ukrayina şeerleri ve köyleriniñ grajdan infrastrukturalarına maqsatlı darbelerini endirip, vatandaş ealisini öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
