Onıñ muracaatı BM insan aqları Şurasınıñ 57-nci sessiyası çerçivesinde keçirilgen "Açıq ava tübünde apishanede on yıl: İşğal etilgen Qırımda insan aqları" tedbirinde kösterildi.
"Milletlerara toplulıqnı ve Birleşken Milletler Teşkilâtını oğlumnıñ azat etilmesi içün küreşte oña seslenmege ve aqiqatnı bildirmege çağıram. Sessizlik yalıñız yamanlıqnı quvetleştirir. Oğlum içün bu küreşte yalıñız özüm küreşem, dedi Ayşe Kurtamet.
O, Appaznıñ babası da Rusiye quvetçileri tarafından tutulğanını ve hırsızlanğanını hatırlattı. Şimdi oña qarşı qabaatlav azırlanıla.
Ayşa bildirdi ki, oğlu şimdi Rusiyeniñ Vladimir şeerinde apiste yata.
Meclis reisi Refat Çubarovnıñ malümatına köre, 2022 senesi iyülniñ 23-nde Kurtamet Herson vilâyetiniñ Geniçesk rayonındaki Novoalekseyevka qasabasından ilhaq etilgen Qırımğa, tuvğanlarına ketti. Onıñ Qırım ve Herson vilâyeti arasındaki memuriy sıñırdaki Rusiye keçiş noqtasına sağ-selâmet kelgenini bilemiz. Bundan soñra Kurtametniñ tuvğanları ile bağları kesildi. Bundan soñ onı Rusiye quvetçileri yaqaladı.
Qırımtatar faali Elmaz Qırımlı Facebook saifesinde yazğanına köre, rusiyeli taqiqatnıñ versiyasına köre, Kurtamet 500 grivna dostuna bergen, soñra Appaz bilgenine köre, o, "Qırım" batalyonında hızmet ete eken.
2023 senesi aprelniñ 20-nde Aqmescitniñ Kıyiv rayon mahkemesi 2022 senesi iyül ayında Herson vilâyetiniñ memuriy sıñırından qaçırılğan Appaz Kurtametni 7 yıl sert rejimli koloniyada qalmasına üküm etti.
2023 senesi avgustnıñ 29-nda Rusiye kontrolindeki Qırım Yuqarı mahkemesi Apaz Kurtametniñ ükmüni deñiştirmedi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
