Rusiye Devlet Dumasınıñ spikeri Vâçeslav Volodin Ukraina prezidenti Volodımır Zelenskıynıñ «Dom» telekanalına intervyü berip, Qırım aqqında aytqanlarına cevap berdi. Volodin telegram-kanalında yazdı.
«Laflar farqlı ola, amma bu samimiy olmasañ ve sevmeseñ, aytılmaycaq olğanlardan. Zelenskıy Qırım sakinlerine ilân etken suv, energiya, naqliyat, azıq ve maliye qamaçavlarını «sevgi» dep saysa, bu sevgi degil, bu bir genotsid. Azıq ve suv olmasa, Qırım sakinlerine ne olur edi, tüşüniñiz», – dep yazdı Volodin.
Ukraina prezidentiniñ aytqanlarına Rusiye kontrolindeki Qırım yolbaşçısı Sergey Aksenov da cevap berdi.
Avgustnıñ 2-nde Ukraina prezidenti Volodımır Zelenskıy «Dom»telekanalına bergen interyüsında Qırımnı işğalden qurtaruv «tek vaqıt meselesi» ola, dep bildirdi.
«Qırım bir vaqıt rus toprağı olmaycaq. (Qırımtatarlarınıñ – QA) Tatarlarnıñ aqlını silip, «mında yoq ediñiz», «sürgünlik uydurıldı», dep aytmaq mümkün degil. Bu imkânsız. Tarihnı yañıdan yazsañız da, şeerlerniñ adlarını deñiştirseñiz. Episi evlerine qaytacaq. Bu tek vaqıt meselesi», – dedi Zelenskıy.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
