Rusiye kontrolindeki Qırım yolbaşçısı Sergey Aksenov Ukraina prezidenti Volodımır Zelenskıynıñ yarımada «bir vaqıt ruslarnıñ olmaycaq» laflarına cevap berdi. Aksenovnıñ fikirince, Zelenskıy «Ukraina halqına qarşı yapılğan cinayetlerniñ ortağı oldı».
«Qırımlılar resmiy Kyivniñ «sevgisini» is etti, o, qamaçav, bitmegen qorquzuv, diversiya ve terakt ıntıluvlarında, yalan ve iftiralardan belli, Ukraina siyasetçileri em memleket içinde, em halqara meydançıqlarda iftira ata. İnsanlar bu «sevgiden» çoqtan bezdi. Ne yazıq ki, Zelenskıy Ukraina halqına qarşı yapılğan cinayetlerniñ ortağı oldı, cevap berecek», – dep yazdı Aksenov içtimaiy ağdaki saifesinde. Ve Rusiye ilhaq etken Qırım «Rusiyege ait edi ve oña ait olacaq», dep qoştı.
Avgustnıñ 2-nde Ukraina prezidenti Volodımır Zelenskıy «Dom» telekanalına bergen interyüsında Qırımnı işğalden qurtaruv «tek vaqıt meselesi» ola, dep bildirdi.
«Qırım bir vaqıt rus toprağı olmaycaq. (Qırımtatarlarınıñ – QA) Tatarlarnıñ aqlını silip, «mında yoq ediñiz», «sürgünlik uydurıldı», dep aytmaq mümkün degil. Bu imkânsız. Tarihnı yañıdan yazsañız da, şeerlerniñ adlarını deñiştirseñiz. Episi evlerine qaytacaq. Bu tek vaqıt meselesi», – dedi Zelenskıy.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
